Headlines

“Etu Nisina Hamla Toh Security Te Galdi Nathakile Nahoi “: Ex-Spy Pora Pulwama Te Koise

HYDERABAD/NEW DELHI:  Vikram Sood India laga spy agency RAW laga purana chief, pora koise ki suicide car bombing pora Jammu and Kashmir laga Pulwama te adangwati laga hamla howa toh “konoba jakka te security te galdi ” nathakiya ke nahobo. “KI galdi thakise, etu toh moi najane, hoilebi etu nisina hatsa toh konoba jakka te security te galdi nathakile nahobo,” Mr Sood pora Hyderabad laga ekta event te koise.

“Sob jaane ki ekjun pora opor te manu hisa loise. Etu bomb khan kheniya manu konoba thakibo.  Konoba pora etu bomb lagaise.  Konoba pora gari anise. Tai khan logote (CRPF) laga gari bera laga khobor thakise,” Research and Analysis Wing laga purana chief pora kosie.

Asol toh sepahi khan toh shuraksha nimite hawa pora loikena berai hoilebi Thursday te lamba 78-gari laga convoy toh Jammu-Srinagar highway te berai se, etu pora hamla koribole aaram hoi jaise.  Pakistan-based  adangwati  group Jaish-e-Mohammed  laga 22-saal adangwati pora convoy bar korikena jaikena 60 kg RDX bhutaise.

Etu desh laga  sobse dangor intelligence officers logote Home Minister Rajnath Singh buhikena closed-door meeting Delhi te Saturday te loise, etu toh 40 CRPF  moriya laga hamla te Pakistan laga hisa ke sai kena documents bonaibole loise.

Prime Minister Narendra Modi pora koise ki kono Pulwama adangwati hamla laga zimmedari loise tai khan “besi bhari daam” deraibo aro tai khan pora “besi galdi korise “. Pakistan ke  ‘Most Favoured Nation’ kono toh trade benefits pabo karne diya naam toh hatai dise, aro osor laga desh pora sob saman  import koriya ke etiya 200 per cent duty maangiye. Diplomatic front te, India pora international community ke Pakistan ke tai khan laga maati te adangwati khan ke moidot diya pora narukhiya tak aalag koribole kosie.

Ketiya India pora ki aalag opai julaibole paribo koikena hothiya ke, Vikram Sood pora koise, “Etu toh boxing match nahoi. PM pora kowa nisina nijor laga hisab pora, nijor laga samoy te aro nijor pora juniya jakka te kuribo. Etu toh aji nahoile kali nahobo.”

Jammu and Kashmir laga Uri te September 2016 te sepahi camp te hamla korikena 19 sepahi moriya bicche te   Army laga special forces pora Line of Control te adangwati laga camp khan sob biya kori dise. Etu ekdum tez aro khatarnak surgical strike toh besi kamiyab thakise kile koile mission planners khan pora adangwati khanke besi biya pora marise.

India pora United Nation P5 countries -tate China , the Gulf, Japan aro European desh khan milai kena thakiya logote Pakistan pora adangwati ke modot koriya janaidibole meeting shuru korise, NDTV ke khobor paise.