Headlines

Hornbill laga Day 6

Governor of Mizoram: Hornbill Festival toh ekta alag platform ase Cultural diversity dekhibole

 

Kohima, 06 December: Thursday din Kisama Heritage village jaga deh Department of Art and Culture pora day 4 Cultural event loise. Etu time deh chief guest, Governor of Mizoram Kummanam Rajasekhar pora event suru kora thakishe aro special guest toh Major General V.K. Mishra thakishe. Event laga host toh, Minister for Transport, Civil Aviation & Railways and Land Resources, P. Paiwang Konyak aro Advisor Skill Development L & E CAWD, Kazheto Kinimi thakishe. Governor of Mizoram, Kummanam Rajasekhar toh north east laga sobse dangor cultural extravaganza deh hesha thaka pora ektum kushi powah kotha janaideya thakishe. Festival laga mission toh Naga heritage laga richness deh renew kuribole, bachabole, aro thek pora rakhibo karni ase aro traditional toh ektum sabha pora dekhi ase, koikena tai janaishe. Tai pora kowah toh, alag-alag tribes laga traditional dances, sports aro songs toh sal deh ek-par hee ahhai. Tai pora aro kowah toh, cultural dances, indigenous sports aro folk songs toh rich medium ase. Etu pora Nagaland culture toh desh laga tusara jaga tak othabo. Tai pora kowah toh, etu sundor aro lively mana toh ektum mystic aro interesting ase koikena janise. Tai pora etu festival toh ekta alag platform hoise koise. Etu pora Nagaland laga manu ekala ke nohoikena seven sisters laga manu aro alag-alag desh aro duniya laga tourist nemide platform hoise. Tai pora Nagaland laga manu khan logode congratulate korise. Kelay koile etu festival toh ekta besi important aro porah duniya deh festival laga kotha kora, bonabole para karni. Din laga cultural program toh Sumi cultural group khan pora traditional game Akhetsu Kukakeu (top spinning) korikena suru howah thakishe.  Etu bechide Yimchunger tribe pora folk song Wochak Khundung kora thakishe. Zeliang tribe pora Awaina Lim amur falcon dance kora thakishe. Rengma cultural group pora Nyuhonyu KehuLu kora thakishe. Angami cultural pora Neiyie Tsupre game dekhaideya thakishe. Sangtam cultural group pora Furu Thsuh Khisong kora thakishe. Pochury cultural pora be indigenous game Adoubvu Akhanyo dekhaideya thakishe. Kachari cultural pora serpentine dance (Baikhon/Bai Jubu) kora thakishe. Lotha cultural group pora traditional game Ejupta (cock fight) dekhaideya thakishe.

 

Kisama Heritage Village deh Afternoon Cultural Programme loise

               

Thursday din kisama Naga Heritage Village  jaga deh, Cultural programme laga afternoon session deh Air Marshal Raghunath Nambir, AVSM VM and BAR, AOC-in- Chief Eastern Air Command aro S. Snehalatha Prl. Accountant General, Accounts and Entitlement (TS) Telengana toh guest thakishe. Programme toh Minister for PHE, Jacob Zhimomi pora host kora thakishe. Alag-alag cultural group khan pora afternoon session time deh cultural show dekhaideya thakishe. Kuki Cultural group khan pora Ozia Vantong Ngoih Tsai song aro dance kora thakishe. Phom cultural group pora Phom tribe laga folk song (Monyu Dhongphu Asho) kora thakishe. Chang cultural  group khan flok song (Sekmo Onet) kora thakishe. Garo cultural pora Rugala Chroka dekhaideya thakishe. Etu toh ancient A’chiks pora kori thaga laga ase. Chakhesang cultural group khan pora folk song (Runye Lu) gaa thakishe. Etu toh Runye festival time deh gai. Ao tribe laga Ao cultural group youngster khan pora indigenous game khela thakishe. Etu game pora youngster laga ability, agility, flexibility aro technique deh mana laga ase. Chief Guest logode Deputy CM, Y.Patton and Minister for Higher and Technical Education, Imna Along aro tusara dignitaries khan thakishe.