Nk Exclusive

Kisama te Horbill Festival shuru hoishe

Naga Heritage village, Kisama te Hornbill Festival laga inaugural function te ahikene thaka Nagaland Governor P.B. Acharya, Nagaland CM T.R. Zeliang, Assam CM Sarbananda Sonowal laga noksha.
Naga Heritage village, Kisama te Hornbill Festival laga inaugural function te ahikene thaka Nagaland Governor P.B. Acharya, Nagaland CM T.R. Zeliang, Assam CM Sarbananda Sonowal laga noksha.

Kohima, Kisama, December 1: Statehood Day laga din te Festival of Festivals- Hornbill Festival bi shuru hoikene thakishe aru eitu festival laga 17th edition ke 1st December 2016, Naga Heritage village, Kisama te shuru korikene thakishe. Occasion laga chief guest Nagaland Governor, P.B. Acharya thakishe, Assam Chief Minister Sarbananda Sonowal toh guest of honour thakishe aru Chief Minister of Nagaland T.R. Zeliang toh Chief Host thakishe. Parliamentary Secretary for Tourism, C.Apok toh eitu inaugural programme laga host thakishe.

Hodai sal Statehood Day logot coincide korikene Government of Nagaland pora Hornbill Festival ke organize korikene thaka karone bisi khusi paikene ase koikene chief guest pora occasion te kotha korikene koise. Poila te Statehood laga homoi te Nagaland laga manuh karone sacrifice korikene thaka State laga pioneers khan ke bi Governor pora eitu auspicious occasion te tai laga thanks janai dikene thakishe. Tai pora koise, Nagaland toh festival laga jaga ase aru eitu nimite ami khan pora ami khan laga rich culture aru tradition ke eitu nisena festival pora promote korikene state te tourism ke boost koribole lagibo. Naga manuh laga rich cultural heritage ke revive koribole karone festival toh ekta bhal tarika (ideal way) ase. Eitu festivals khan pora tourism industry ke promote kore aru eitu nimite state laga infrastructure quality toh bhal hoi jaikene thake.

Naga manuh laga nature ke describe korikene Acharya pora koise, Nagas manuh khan pora dusra manuh khan ke respect korikene thake aru monn te ‘sense of forgiveness’ bi thake. Governor pora domestic aru international tourists khan ke koise, facilities ke bhal pora cholaikene thakibi aru wapas ghor ja homoi te bhal yaad (memories) loikene jabi.

Nagaland Chief Minister pora welcome address korikene 53rd Statehood Day laga occasion te Nagaland laga manuh khan ke greetings dikene thakishe. Assam Chief Minister aru tai laga colleagues bi positive thakikene bisi bhal friendly gesture dikhaikene thaka karone Zeliang pora thanks janai dikene thakishe.

Chief Minister pora koise, Naga manuh khan toh tai khan laga rich culture aru tradition ke bachaikene preserve koribole determine ase aru eneka thaka toh ami khan laga identity laga hallmark ase. Nagaland toh mainland te pora geographically isolated ase koikene thaka kotha toh bisi joldi purana kotha hoi jaikene thakibo kile mane etiya “Look East Policy” ahikene ase aru Hornbill Festival bi internationally recognize kori dikene ase.

Assam Chief Minister Sarbananda Sonowal pora koise, Hornbill Festival laga part hobole toh ami karone honour laga kotha ase. North East laga manuh aru especially Nagas pora North East laga rich culture aru tradition ke showcase koribole karone eitu toh ekta bisi dangor opportunity ase. Hornbill Festival pora Nagaland laga manuh khan majote closer understanding ani dibo aru sob jaati (tribe) pora tai khan laga unique culture aru tradition ke showcase koribole paribo. Ahom Kingdom laga homoi te Assam aru Nagaland majote thaka bhal relationship laga kotha bi Sonowal pora koikene thakishe.

Ungma village laga Guru Sangyusang Pongener pora Traditional blessing offer korikene thakishe, Sky Entertainment pora ‘Unity in Culture’ laga inaugural celebrations present korikene thakishe.

Cultural dance present korikene thaka troops khan toh: Chingdang Village Cultural Troupe (Konyak), Waromong Village Cultural Troupe (Ao), Phaijol Village Cultural Troupe (Kuki), Kithagha Village Cultural Troupe (Rengma), Phoyisha Range Cultural Troupe (Pochury), PholamiDzuvekro Cultural Troupe (Chakesang), Mezoma Village Cultural Troupe (Angami), Tuensang Village Cultural Troupe (Chang), Yehemi Village Cultural Troupe (Sumi), Wokha Village Cultural Troupe (Lotha), Kachari Cultural Troupe Purana Bazar (Dimapur), Sangphur Village Cultural Troupe (Yimchunger), Nsong Village Cultural Troupe (Zeliang), Orangkong Village Cultural Troupe (Longleng, Phom), Ekranipathar Village Cultural Troupe (Dimapur) Garo, Pathso Nokeng Cultural Troupe (Khiamniungan) aru Angangba Village Cultural Troupe (Sangtam).

Assam laga cultural troupe pora tai khan laga colourful Assam folkdance present korikene thakishe. Sr. Pastor, Baptist Mission Church, Kohima, Rev. Moa Longchari pora God’s blessing invoke korikene thakishe aru Parliamentary Secretary for Tourism & Hornbill festival Host C. Apok Jamir pora vote of thanks dikene thakishe.

State Government pora organize korikene thaka eitu festival toh Annual Tourism promotional event ase aru tate Nagaland laga traditional & rich cultural heritage ke showcase korikene thake.

Eitu fest te sob elements khan ekta jaga te ahikene total Nagaland hoi jaikene thake. Hornbill Festival toh sob Naga jaati laga collaborative celebration ase, Eitu event te sob Naga jaati (tribes) khan ekta platform te ahikene thake aru eitu nimite Hornbill Festival ke ‘Festival of Festivals” laga naam pora bi matikene thake. Hornbill chiriya (bird) laga bhal qualities – alertness aru grandeur ke Naga khan pora bisi admire kore aru eitu nimite eitu great “Hornbill” ke tribute dibole eitu festival ke observe kore. Eitu chiriya toh Nagas laga social aru cultural life logot related ase aru nana kisim Naga tribal folklores, dances aru songs te eitu chiriya ke reflect korikene ase.

Naga heritage laga richness aru uniqueness ke revive, protect aru preserve koribole karone Nagaland laga Hornbill Festival toh cultural extravaganza ase. Olop sal bithor te eitu festival pora bisi bhal status maintain koribole parikene ase. Eitu fest te Tourists khan pora Nagas laga cultural diversity ekla ke nahoikene North East India laga sathta (7) sister states laga cultural diversity ke sabole karone ekta unique platform hoi jaikene ase.