Regional

Myanmar Te Thyakiya Northeast Laga Bithor Manu Khan Karne Biya Khobor

GUWAHATI, Feb 17: Myanmar te logaikena thakiya Northeast India laga bithor manu khan nimite biya khobor ekta te, ekta khobor paise ki Myanmar government pora bithor manu khan logote khilaf dagot kadam loise aro Taga area te Myanmar army laga ekta permanent camp bonaise, etu area te bithor manu khan laga camp khan ase. Myanmar government pora khobor hisab bithor manu khan laga request ki tai khan laga desh te comp khulibole ke maana korise.

Assam Tribune laga ekta khobor te koise ki  Myanmar bases pora India te besi bithor manu khan ahiya toh etiya tak dekhiya nai hoilebi sepahi khan ke chetauvnee dise ki bithor manu khan bera laga rasta ke bhal pora sabo karne.

Khobor pora koise ki konoba samoy karne Government of India pora Myanmar ke tai khan laga desh bithor te camp bonai kena thakiya bithor manu khan logote khilaf  kadam lobole request kori thakise kile koile etu toh northeastern region laga law and order halat bhal koribo nimite besi zarrori ase. Hoilebi etu area khan te Myanmar government laga haat besi ponchi kena thakiya nai, besi bhag Taga te bithor manu laga camp besi thakise. Hoilebi olop din majote Myanmar sepahi khan pora Taga te permanent base lagaise aro bithor manu khan ke tai khan laga camp khan khali koribole koise. Government of Myanmar pora sabha pora koise ki India laga bithor manu khan ke tai khan laga desh te camp bonaibole nadibo aro etu nisina halat biya howa nimite bithor manu khan, tai khan laga camp joldi podli koribole laagise.

Sources pora koise ki khobor powa hisabte, Myanmar government pora NSCN(K) ke formal ceasefire agreement sign koribole joborjosti kori yhakishe aro aalag bithor manu khan ke tai khan laga facilities julaibole nadibole koise. Northeast laga besi bithor manu khan , tate Manipur laga bithor manu khan aro United Liberation Front of Asom (Independent)  milaikena, Myanmar te NSCN(K) laga camp juali thakise aro etu desh laga government pora sitha koise ki etu harkat toh etiya pora julaibole nadibo. Security agencies logote thakiya khobor laga hisaabte, ULFA(I) aro konoba Manipur laga groups nisina bithor manu khan pora Myanmar government ke tai khan laga camp toh tai khan laga desh te khulibo paribo karne request kori thakise, hoilebi etu request ke maana korise. Myanmar sepahi pora bithor manu khan laga besi haadiyar thurise aro area te bithor manu khan ke bisari ase. Juti NSCN(K) ke aalag bithor groups khan nisina ceasefire agreement sign koribole joborjosti kuribo parile, etu Naga bithor manu khan pora aalag bithor manu khan ke modot koribole dukh pabo, khobor pora janai dise aro koise ki etiya laga halat hisab te, aalag bithor manu khan Myanmar te NSCN(K) laga modot naloikena pajibole naparibo.