Headlines

NLSUC kan Chandigarh te

October 22, 2018
112 Views

CHANDIGARH, OCTOBER 22 : Nagaland Students Union Chandigarh (NLSUC) kan tai kan laga ahke Annual Gathering cum Freshers Social din toh 18th October 2018 te manaise. Etubi YCWA Hall, Sector 11B, Chandigarh te. Aro etu din mana toh “ Igniting Towards Unity” Theme hisabte manaise koise.

Etu din te Chief Guest nemite Shri, Louis Lopez, St. Stephen School Chandigarh laga Principal ahe kena thakise. Etu din te kotha kurikena tai students kan ke ki-ki kam thik pora kurikena thakibole aro neju laga babuna te mon de kena ahkete jabole karne mon te chuhi diya laga kotha kan janaide thakise koise. Tai bi Students kan kobi Freshers kan ke asulte tai kan bapa-amma aro neju shati chari kena kitab buribole aha toh bhal te husa kebi mon de kena kitab buri kena thakibole janaise. Aro tusera ki-ki kan students kan nemite bhal hobole laga kotha kan janaide thakise koise.

Etu oporte tai bi NLSUC laga Executives aro Advisors kan ke besi khushi baa (appreciated) aro ahkete etu nesena bhal te kam julai kena jabole kotha janaide thakise koise.

Etu din te 2 ta Session thakise. Etu toh Formal aro Extravaganza koi kena thakise. Aro etu Formal Session toh Rongsenmenla Phom aro Hisolo Tep pora Host kuridese. Aro Extravaganza toh Chumroba J Sangtam pora Host kuridese koise.

Ahke wala Session te NLSUC President Chollen Chang pora Presidential Address kuridese. Aro NLSUC laga Constitutions kan toh Chief Guest pora janaidese aro ulaidese koise. Vote of Thanks toh NLSUC General Secretary, Woremo Lotha pora kuridese.

2nd wala Session, Extravaganza te toh Students kan alak-alak Institutions kan alak-alak Activities kan dekhaidese. Etu kan toh Cultural Show, Music aro tusera bhal-bhal kan dekhaidese. Folk Song toh Limakumla, Amenla aro Mhashevolu, RIMT University pora dekhaidese koise.

Etu din laga Mr Freshers aro Ms Freshers bi junise. Etu ke Miss Avikali Shikhu koi kena Panjab University, Chandigarh laga pora Ms Fresher nemite junise. Aro Mr Stephen Zeliang koi kena Aryans Group of College, Chandigarh pora Mr Fresher nemite junise koise. Etu din te nai-nai koilebi 125 jun students besi jun ahe kena thakise. Aro etu din toh bhaat khai kena khotum kuridese koise.