Headlines

Parliament deh purana PM Atal Bihari Vajpayee’s laga noksha thalibole ase

February 12 direk Parliament laga Central Hall deh, purana prime minister Atal Bihari Vajpayee laga dangor noksha (portrait) toh thalibole ase.

Noksha toh President Ram Nath Kovind para olabole ase. Etu time deh Vice President Venkaiah Naidu, Prime Minister Narendra Modi, ministers aro alag-alag parties laga leaders khan be thakibole ase.

Vajpayee toh BJP laga ocha leaders thakise. Tai Prime Minister nemide tin para khara kora thakise. First toh 1996 deh 13 din karni PM howah thakise, 1998 para 1999 tak 13 moina karni PM howah thakise aro 1999 para 2004 sal tak PM howah thakise.

Vajpayee toh Madhaya Pradesh, Gwalior jaga deh December 25 direk 1924 deh jonom powah laga ase. Tai lamba din bemari para dukh pai thakikena August 16, 2018 deh mora thakise.

Jowah sal December 18 direk parliament’s Portrait Committee laga meeting time deh noksha toh thakibo koikena mana thakise. Etu time deh meeting laga chairperson toh Lok Sabha Speaker Sumitra Mahajan thakise.

Meeting deh Deputy Speaker M Thambi Durai, Congress leader Mallikarjun Kharge, BJD’s B Mahtab, TMC’s Sudip Bondopadhyay, TRS’ Jithendra Reddy, Shiv Sena’s Ananth Geete aro BJP’s Satyanarayan Jatia thakise. Tai khan para he noksha toh thalibo koikena fesla kora thakise.

Central Hall deh poila para leaders laga noksha thalikena thaga toh, purana prime ministers Jawaharlal Nehru, Indira Gandhi aro Rajiv Gandhi laga ase.