Nagaland

Pre Monsoon Preparedness Meeting loise

Secretariat Conference hall jaga deh review Pre Monsoon Preparedness laga meeting toh AHODs, HODs aro DCs logode lowah thakise. Etu time deh Chief Secretary, Temjen Toy, IAS para kowah toh, “Sob department para ke laga hatsa nemide check aro daiyar kori thakibo lagi. Kelay koile Nagaland toh landslides para be dekthari ola thaki aro etu toh monsoon seation time deh bari pani keri thaga aro drainages deh pani rokhija nemide ase. Thek samai deh action loise koile ke ke hatsa hobole thaga para bachibole paribo”.

Pre monsoon preparedness meeting time deh Nagaland deh monsoon season para dukh pabole opor deh besi kotha kowah thakise. Monsoon season time deh eku gondogol nahobo nemide, meeting deh house para 4th May 2019 deh mass social work toh sob state deh lobole laga fesla korishe. Etu nesana meeting toh district deh DCs para line departments logode lobole ase aro etu toh pre monsoon deh daiyari thakibole laga hobo.

Moonsoon seasion time deh rasta block howah opor deh alag rasta toh NSDMA aro line departments para lead korikena sob DCs para notun rasta olabo. DC logode Road & Bridges department para be alag rasta opor deh kaam koribole laga fesla korishe aro monsoon season time deh kaam laga rasta jolabo laga fesla korishe.

Gondogol howah time deh khaa-lowah supplies para dekhari pai thaga opor deh fesla kora toh, divisional godown deh khaa-lowah toh jama koribo. Kelay koile affect howah manu khan ke nohoile lagi thaga manu khan nemide etu toh relief materials nemide jolabo karni.

District levels deh District Hospitals, Community Health Centres aro PHCs  deh Health and Family Welfare Department para wadai aro manpower toh thek para rakhibole fesla korishe. Kelay koile ke laga emergencies deh hoilebi jolabo nemide.

Dimapur aro Medziphema areas laga konbah jaga deh khor laga janwar khan ke bemari thura opor deh kotha korishe. Kotha korikena animal husbandry department logode bemari ola opor deh sabo nemide dawai khan thek para rakhibole koishe aro monsoon season time deh ke laga bemari ola opor deh sabo karni drugs toh stock deh thek para rakhibole koise.

Meeting deh bhari pani aro hailstone para beya kora ke sabole laga, SDRF personnel logode aro besi training debole aro refresher course debole aro Saman kena deh NSDMA para dist SDRF logode consult koribole laga kotha fesla kora thakise. OSD Johnny Rongmei para be  pre-monsoon preparedness meeting deh power point presentation deya thakishe.