Tuensang

Yimchunger Union Dimapur para Tsungkamneo Festival manaishe

Jowah kali Yimchunger Union Dimapur para Dimapur District Sports Complex jaga deh Tsungkamneo Festival toh special guest Deputy Commissioner Dimapur, Kevekha Kevin Zehol, NCS aro guest of honour Director NEC, Energy Pvt. Ltd. Sapu Bhattacharyya logode manaishe.

Jama howah jaga deh DC para Yimchunger laga manu khan logode nature aro resources deh bachai rakhibole aro sai thakibole janaishe. Kelay koile etu para he ami khan logode ashirbad hoi koikena. Tai khan laga area deh Likimro hydro project aro Fakim wildlife sanctuary thaga toh ektum gopal ase koikena DC para janaishe. Etu para tai manu khan logode project khan de phal para sai thakibole janaishe. Tai para kowah toh, judi manu khan nejor laga area ke neglect korise aro resource thek para jolanai koile area toh jungle he hoijabo koise. State deh unemployment dekthai thaga ke DC para Yimchunger community laga young manu khan logode duniya toh ektum competition ase koise. Khali fiftest nesana manu he bachibo koise. Zehol para be nejor laga bosti deh nathaga hoise koilebe nejor laga culture toh bachai rakhibole janaishe.

Guest of honour, Bhattacharyya para tai laga speech time deh, sob festival toh pre nahoile post harvest melikena thaki aro peace aro reconciliation laga time thaki koise. Etu para tai Yimchunger laga manu khan logode eku division bhabona nakorikena ekta community hobole janaishe.

Katha speech toh vice president Yimchungru Tribal Council, Kiumuhean, ex MLA, R Tohanba, Judicial Secretary, Western Sumi Hobo, Hekhevi Achumi aro President Naga Council Dimapur, Bangerloba LKR para be dese.

Programme deh tusara highlights toh, Convenor organising committee,  Akumba Yim para welcome kotha korishe. R Shitipong para Tsungkamneo laga meaning janaishe. Pougue Lily para Solo of Tender Bud korishe. Tsunrun cultural club Dimapur aro Khungriso cultural troupe para folk songs korishe. traditional costumes dikhaishe. President YUD. Albinus Atsumong para vote of thanks janishe. pastor YBCD, Athsan aro Church Clerk YBCD, Asangba para invocation aro benediction prathana korishe. Formal programme bechide indigenous games, folk dances aro feast thakise.