International

Zahar kachara nimite bishi manu khan bimar hoishe

Kuala lumpur: Authorities koishe nodi te zahar thaka kachara phela nimite Malaysia te ekso opor schools khan bon kurishe. Etu nimite Malaysia te etiya bishi manu khan bimar hoi kena ase. Bimar huwa khan majote bacha khan bhi ase.

Jua hafta southern Johor te ekta lorry (truck) para etu zahar thaka kachara toh nodi te phelaishe koishe.  Etu nimite etu osor te thaka jaga khan te etu zahar thaka kachara toh feli (spread) jaishe. Etu nimite manu khan bishi ulti aro chakkar ahishe koishe.

Official news agency Bernama hesab te panchso opor manu khan etu zahar gao bhitor te ja nimite hospital para medical treatment loishe aro etiya hospital te 160 genika manu khan admit kuri kena ase. Etu te bishi toh school jai thaka bacha khan ase.

Etu toh thik para najani kena ase ke industrial town Pasir Gudang para kuntu zahar toh nodi te felaishe.

Education Minister Maszlee Malik para suru te etu jaga osor te thaka 43 schools khan ke bon kuribole adesh de kena thakishe. Hoile bhi olop samay pichete schools toh aro bishi bon kuribole lagishe.

Education Minister Maszlee Malik para koishe education ministry para etu fasla loishe ke Pasir Gudang jaga osor te thaka sob 111 schools toh immediately bon kuribole lagibo.

Education ministry para sob parties khan ke precautions loi kena thakibole koishe.