10 years laga Successful Modelling Career picheyte Bella Hadid   break loi asey

Hollywood, May 3 : Supermodel Bella Hadid para share kurisey ki 10 years picheyte tai tailaga successful aro glamorous modeling career para olop homoi nimitey break loi asey, Aro Texas te tailaga partner, Adan Banuelo logotey ekta nutun chapter suru kuri asey. Bella Hadid para Allure magazine ke koisey, “ Modelling kurikina 10 years huwa  picheyte, ami para realise kurisey ki ami tu bisi lamba homoi para enaka bustu te bisi energy, pyar aro effort dhali thakisey kuntu lamba homoite amikey eku wapas di thakanai.” Bella Hadid para modeling career tu 16 years te suru kurisey,  Flynn Skye laga ekta commercial project logotey, kuntu tu maiki khan laga kapra brand asey.  Hoilebi tai para 2014 te fall New York fashion week te ekta Spanish fashion label, Desigual nimitey fashion walk kora picheyte tailaga career agey barisey. Aro etu laga olop moina picheyte tai Tom Ford laga collection nimitey runway te appear hoisey. Bisi bhal height(5’7) paikina aro chehra aro tailaga chehra aro gao laga feature khan bi sundur hoikina  hadid para fashion aro glamour laga industry te naam kamaisey. Etu opor te, modeling laga alava, Bella Hadid tu TV show Keeping Up With the Kardashians te, Real Housewives of Beverly Hills aro Making a Model with Yolanda Hadid te bi appear hoisey. Bella Hadid para koisey ki Texas te tailaga zindigi bodli hoisey. Aro etya tailogotey homoi bitabole nimitey ekta close friend group asey. Tai nijor ke enjoy kuri asey aro etu friend khan logotey bahar ja homoitey ekdam fancy(style aro daami) para dress kuribole laga jarurat mehsoos nokorey. Tai para koisey, ‘First time, etya ami ekta nakli chehra dikhanai. Ami bhal mehsoos nukurile ami najabo. Ami bhal mehsoos nukuriley, ami nijor nimitey homoi loi. Aro amike enaka kuribole laga moka tu poila te  kitya bi panai.” Tai para agey barikina koisey ki etya, jitya manu khan para tailaga picture dikhey, taikhan para koi ki tai tu hosa para bi khusi thaka nisna dikhi asey aro tai nijor laga barite bhal mehsoos kuri asey. Etya tai chutu-chutu bustu ke enjoy kuri asey aro jibon te eku regret nai koisey.