Delhi te political mohol tu bisi jordar hoiasey kilemaney Bharatiya Janata Party (BJP) tu Delhi te raaj kurithaka Aam Aadmi Party (AAP) ke ahibole thaka assembly election te challenge kuribole tayar hoiasey. Taikhan laga jordar campaign nimitey mashoor thaka party BJP tu eku kasar nacharikina asey. BJP para AAP laga leader khan laga khilaf te central probe(jaanch kora) agency khan ke lagai asey. Aro etu laga main target tu Delhi Chief Minister Arvind Kejriwal asey. Etu eku kasar nachara laga strategy para dikhaiasey ki BJP tu AAP ke New Delhi te thaka taikhan laga takat para hataidibole nimitey pura ji-jaan lagai diasey. BJP nimitey AAP tu ekta kamjor dushman nohoi. Bisi saal para, AAP para ekta tagra aro strategic takat asey koikina sabit kurikina ahiasey, kun BJP ke leadership aro election laga tactic te barabar takkar dibole parey. Kejriwal para rajya ke chola laga record aro tai para politics te bhal judgement aro joldi decision lobole pariya para AAP ke ekta kara opponent banaikina rakhidisey. Hoilebi AAP para taikhan laga khilaf te thaka ekta opposition party Congress logotey bi larayi kuribo lagey, kunlaga Delhi te political naseeb tu Kejriwal power te aha picheyte biya hoijaisey. Delhi te Congress laga takat girija tu taikhan para desh te struggle kora para dikhibo pariasey. Congress tu New Delhi te Sheila Dixit laga under te ekta dominant takat thakisey, kun para tailaga 15 years Chief Minister tenure te Delhi bodli hoija dikhisiley. Hoilebi Congress party tu taikhan laga 2013 te elction te haar huwa picheyte aro uthibole naparikina asey. Congress party laga Delhi te takat girija laga bij(gutti) tu Anna Hazare para chola India Against Corruption movement laga homoitey lagaisiley, kotey Kejriwal laga dangor haath thakisey. Etu movement para Congress opor te public laga biswas haraidiya hey nohoikina tatey AAP nimitey bi rasta khulidisey. Congress laga problem tu etu asey ki etu party tu family nimitey hey exist kuriasey aro etu nimitye etu party laga leader nai aro followers khan hey asey. Aro etu nimitye etu party tu struggle kuriasey. National(pura desh) laga leadership te etu party tu bisibhak dur thaka nohoilebi shamil nuhuwa nimitey criticize hoithakey. Etu party laga haar te add kuribole, Rahul Gandhi bar-bar dusra desh te trip jaithaka para campaign laga launch khan ke delay kuri thakey. Dusra desh para wapas aha picheyte, Rahul para already diri hoija campaign tu Kejriwal aro Narendra Modi duijun opor te hamla kurikina suru korey, hoilebi etu kosis khan te diri hoijai aro Congress party laga naseeb ke wapas thik kuribole nimitey effective nathaka hoijai. Congress laga etu haar laga aro ekta karon tu INDIA bloc te dusra opposition party khan logotey rishta kamjor thaka bi asey INDIA bloc te thaka sob party khan para Delhi te BJP laga against te AAP ke support kuriasey.
Etu tu safa-safi dikhibole pariasey ki ahibole thaka Delhi election para BJP laga gusa uthikina thaka tactic(strategy), AAP laga takat aro Congress laga haar, etu 3ta majotey bisi difference thaka tu highlight kuriasey
Add Comment