Mobile tu India te 1995 faley ahisiley aro Nagaland te tu olop diri hoikina 2000 te ahisiley. Etu picheyte etya taak bi BSNL aro etu field te gusa nutun private company khan ke taikhan laga service tu aro bisi improve kuribole lagi asey. Hoi, etu hosa asey ki . BSNL North East Circle II under te mobile aro internet service khan biya hoijai asey. Aro private service provider khan tu taikhan laga network thikthak rakhibole pari asey. BSNL logotey sobsey dangor network, bisi kaam kora manu aro resource khan thaka laga bawajut bi bhal perform kuribole mon nathaka nisna asey. BSNL, kuntu ekta homoitey ekta shaktishali government chola company thakisey, eku competition nathakikina, etu BSNL tu utu homoitey market te raaj kurithakisey jitya private company khan market te eku position thakanai. Hoilebi, private company khan market te ahikina 20 years maan huwa picheyte, etu khan para bisi seher te BSNL ke haraidisey aro desh laga dusra-dusra jaga khan te bi dangor hobole continue kuri asey, kuntu majotey Nagaland bi ekta asey. Northeast laga pahari states te, mobile aro internet connectivity tu kitya bi thik nuhuwa laga problem hoikina thaki asey. Ekta jaga para dusra jaga jaisey koiley, signal tu astey-astey kamjor hoikina jai thakey aro bisi area te toh, signal pura puri nathaka hoijai. Internet connectivity thaka jaga te bi, internet service laga quality tu bisikhak biya thakey. 2G para 3G te shift kora etu picheyte 4G te aro etya 5G te shift kora para dangor improvement ahibole laga umeed jagaikina thakisey, hoilebi asol te, internet speed tu etya tak bi slow aro depend kuribole napara laga hoikina thaki asey. Rajya laga manu, students aro business khan nimitey etu thik nathaka internet connectivity para bisi dangor badha ani asey. Online education, digital banking, online business nohoilebi shopping aro aney kotha kuribole tak bi mushkil hoijaisey. Bisi manu khan khali call kuribole aro internet cholabole karney bisi dur travel kuribole aro thik jaga bisaribole majbur hoijai, kotey signal bhal thakey. Government laga initiative aro private telecom provider khan para behtar internet coverage dibole kosom kha laga bawajut, Northeast laga bisi bhak state khan tu etu subidha napaikina asey. Enaka hey chulithakisey koiley Northeast laga manu khan desh laga baki state khan technology faley agey barithaka logotey catch-up kuribole napara hoijabo. Ekta depend kuribole para aro high speed internet tu ajikali luxury nohoikina ekta jarurat hoijaisey. Aro etu laga kami ke dur kuribole nimitey urgent action lobole laga jarurat asey. Act East policy aro Prime Minister para Digital India faley jor diya laga context te Northeast laga bari te bisi ki-ki koisey. Hoilebi asliyat tu alag asey.
Guwahati aro Jorhat nisna dangor seher laga alava Northeast laga dusra jaga khan te BSNL network tu jene-tene choley nohoilebi ekdam murikina thakey. Hoi, nutun private company jaiseki Reliance Jio Infocomm tu market te ahisey hoilebi overall situation tu etya tak bi biya hey thaki asey.
Nutun budget te, government para BSNL ke Rs 33,757.58 crore bhak kurisey. Etu tu juwa bar laga budget para 59% komti asey. Juwa bar laga budget te Rs 72,027.65 crore bhak kurisiley kuntu para BSNL tu Rs 72,027.65 crore hey khorcha kuribole parisey. Dangor investment laga bina aro etya mojud thaka network ke bhal para manage nukurisey koiley, ekta digitally connect hoikina thaka Northeast laga sapna tu pura nohobo.
Add Comment