Itanagar, January 30 : China para Arunachal Pradesh ke claim kora te jawab dikina Chief Minister Pema Khandu para January 30(Tuesday din) te China aro Myanmar ke border kora Arunachal laga Anjaw district te bisi ki ki banabole laga project inaugurate kurisey.

Tuesday din te CM Khandu para Hawai town te Jawahar Navodaya Vidyalaya, Hayuliang town te BADP scheme under te VKV school building, border laga rasta fale RCC bridge banabole aro alag project khan inaugurate kurisey. Etu inauguration tu  Arunachal East MP Tapir Gao, Anjaw MLA Dasanglu Pul aro poila laga CM Late Kalikho Pul laga maiki , Namsai MLA Zignu Namchoom, Dirang MLA Phurpha Tsering aro alag khan laga mojudgi te kurisey.

Chief Minister Pema Khandu para etu event te student khan te bhasan disey aro taikhan ke hodai din behtar manu hobole kosis kuribole advise disey.

Anjaw district tu Arunachal Pradesh laga ekta jaruri hisa asey. Etu laga headquarter tu tatey laga Hawai town te asey. Etu district tu North fale China, west fale Lower Dibang Valley aro Lohit district, South fale Changlang district aro east fale Myanmar logotey border hoikina asey.

Anjaw nisna district te building khan bana laga project inaugurate kora tu Centre para China logotey LAC thaka border area te rasta laga connection behtar kuribole nimitey kadam utha laga asey.

CM Khandu para enaka kosiey, “Rajya te childhood care centre ke eku diktar nohoikina smooth para chulible dibole mon asey. Aro amikhan ke lagi asey ki amikhan laga baccha khan laga early education tu bisi bhal quality laga hobo lagey taki taikhan laga base ke tagra banabo paribo.”

CM para koisey ki Hawai te banabole thaka nutun JNV school tu 22 acres lamba hobole asey aro etu school tu etu jaga laga baccha khan nimitey ekta game bodli kuridiya laga hobole asey. Kilemaney bhal building aro subidha khan para positive impact dhalibole asey. CM para Union Government ke rajya te education laga subidha te nutun improvement ana nimitey dhanyabad disey.