Nagaland

8th Economic Census, 2025-26 te 1st SLCC meeting hoisey

February 20, 2025
5 Views

8th Economic Census te State Level Coordination Committee (SLCC) laga first meeting tu 19 February 2025 te Kohima laga Civil Secretariat te Chief Secretary laga Conference room te kurisey. Etu meeting tu Chief Secretary, Dr. J Alam, IAS laga chairmanship under te kurisey.

Secreatary Economic & Statistics, Akunu S Meyase , para etu meeting laga suruwat kurikina koisey ki etu Economic Census tu desh laga bhitor te thaka sob business/entrepreneurial company hoilebi dukan khan aro etu khan te kaam kora workers khan laga number count kora laga  asey, khas kurikina non-agricultural sector(kheti bari logotey related nathaka nohoilebi industry aro saman khan bana logotey related thaka sector) te. 

Akunupara etu bi janaisey ki aji tak, Ministry of Statistics and Programme Implementation (MoSPI) para States aro Union Territories logotey milikina 7ta Economic Census conduct kurisey.

Meyase para etu bi koisey ki etu 8th Economic Census 2025-26 tu States aro Union Territories logotey milikina, advanced Information Communication Technology (ICT) platform cholaikina conduct kuribo. Kuntu para mobile phone khan te geo-code  thaka(matlab ekta jaga laga details thaka) data collect kuribole, data ke collect kora logalog check kurikina sahi na galat asey etu verify kuribole para aro nigrani rakhibole aro supervise kuribole nimitey interactive Management Information System (MIS) dashboard laga subidha dibo. 

Etu meeting te Chief Secretary para etu census collect kora te shamil thaka department khan laga HoD khan ke district level official khan ke taikhan ke kityabi matey sob support aro jaruri modod dibole laga instruction dibole binti kurisey. Aro sob DC ke meeting kora picheyte hey census laga kaam suru kuribole koisey. Chief Secretary para etu Department ke social media platform laga istamal kurikina economic census laga jankari feilabole aro public khan ke etu laga bari te janaidibole bi encourage kurisey. 

Etu department para inform kurisey ki April laga 1st week te pura desh te etu 8th economic census olabole plan kuri asey hoilebi etya bi confirm huwanai. SLCC laga sob members para etu meeting attend kurisey. Aro Economic & Statistics Department para etu 8th Economic Census te ekta PowerPoint Presentation bi dikhaisey.