Aji kali digital zamana te, manu khan communication aru information opor depend kore, etu para bishi change ahi ase. Etya, enika ekta change juntu sob se beshi impact korise, etu ase social media. Nagaland te bhi, baki duniya nishena, Facebook, Instagram, WhatsApp, Snapchat aru X (Twitter) etu sob manu laga daily life te ekta part hoi jaise. Kintu, jiman etu beneficial ase, tate etu ekta notun ekta addiction bhi hoise — social media laga nasha.
Nagaland, juntu jani jai community bond aru traditional value karone, etu aji digital age te ekta identity crisis face kori ase. Smartphone aru sosta internet plan karone, social media sob jagah te pohchi jaise. Dimapur te thaka student pora loi kena, Mokokchung laga bosti te thaka farmer bhi, sob manu din para din social media te time spend korise — reels sai kena, meme share kori kena, like aru comment bisari kena. Kintu etu laga te, manu nimite ekta silent danger ahise — mental health, productivity aru social relation te problem dikhai ase.
Sob se dangor problem to youth majot te dekhi jai ase. Agete, students outdoor game kheli thaka, kitab pora, family logot time spend kora. Kintu etya, bishi manu mobile screen te busy ase. Ekbar phone uthaile, 2-3 ghonta nikal jaai, na jane kena. Research hisap te, bishi social media use korile anxiety, depression, low confidence aru sleep problem hoi. Nagaland te bhi, students aru young professional sob ke etu problem face kori ase, especially jitya online likes aru attention na pai.
Social media reality ke bhi distort korise. Internet te sob manu laga life bhal, perfect aru luxurious dekhai — filter use kori kena, pose dia photo, expensive lifestyle. Bosti te thaka ekta young manu jodi etu sob daily dekhe, tai nijor life logot compare kori kena dissatisfaction feel koribo pare. Tai nijor ke low value koribo pare, karon tai likes nai pai. Etu karone, youth manu bhal para future te dhyan di bo laga to, tai mobile screen te more interested hoi jai.
Etya problem khali youth te na hoi — bura manu, parents, aru church leader bhi enika addicted hoi ase. Family dinner time te bhi phone use kori, conversation na thake. Sunday church te bhi, kunba manu Bible khula nahoi kena, mobile khuli thake. Etu ekta generation problem nahoi — etu pura society laga problem hoi jaise.
Solution ki ase? Social media ke biya na koribi, kintu responsibly use koribo lage. Etu ekta tool nisena ase — bhal kaam te use korile bhal, bura kaam te use korile nuksan. School te digital awareness class thakibo lage. Church aru NGO sob awareness spread koribo pare. Parents bhi example set koribo lage — screen time control kori kena aru offline activity encourage kori kena. Youth manu sob ke hobbies, reading, game, aru real life bond develop koribo inspire koribo lage.
Nagaland etya ekta crossroad te ase. Jodi ami khan etu social media laga addiction ke ignore kori thakibo, etu ekta pura generation ke screen laga nisha te pasai dibo. Kintu jodi etu problem ke recognize kori, aru conscious step loi, ami khan real life, mind aru community ke bachabo paribo.
Screen te scroll kom kori kena, real life te thakibo lage. Heart to heart connection te wapas anibo lage
Add Comment