Aji kali laga dunia to dangor dangor development aru technology te bishi fast gusi ase, kintu etya somaj khan te dangor dangor problem ahi ase—etu hoise moral hari jai ase. Moral mane to hoi manu biswas, morom, imaandari, humbleness, respect, aru responsibility, juntu ekta somaj ke bhal banai thake. Kintu aji kali laga manu to enika bhal moral khan na bisare, aru etu to ekta dangor danger laga sign ase.
Age laga time te, etu moral khan to family para suru hoi thakise. Misa na kora, dangor manu ke respect dia, komzor ke help kora, etu sob bujai dia jai thakise. School, church, aru elders khan bhi enika moral bujai thakise. Kintu etya to manu sob bisari thake poisa, power, aru success—bhal manu hoa ke bhal para najane. Aji society te imaandar thaka manu ke bhal para na sai, poisa bishi thaka manu ke hero banai dise.
Etu time te family role bhi komti hoi jai ase. Joint family system khotom hoi jai ase aru nuclear family te ma-bap khan busy thake. Bacha khan to TV, mobile aru internet para sob sikhi thake. Etu media khan to beshi jiman superficial aru violence dikhai, juntu bacha khan ke real value para dur loi jai ase. Role model nai, guidance nai, etu karone bacha khan confused hoi jai ase.
School bhi etya academic result te beshi focus kore, na ke moral education. Value education subject ke optional banai dise, aru student khan ke etu subject important na diya hoise. Etu mentality khan para student ke sikha jai ase ke moral khan life te important nai.
Social media aru internet bhi etu problem ke aur beshi barai dise. Manu khan online te fake identity use kore kena, biya comment, hate speech aru bullying kore. Sob ke likes aru comments lagi ase, na ke real manu dukh-sukh bujha. Empathy aru human connection komti hoi jai ase, fake lifestyle aru popularity important banai dise.
Politics aru religion leader khan bhi beshi bar scandal aru corruption te fase ase. Jodi leader khan bhi imaandari rakhibo na pare, tate ordinary manu ke ki hope thakibo? Enika time te manu laga faith to down hoi jai.
Kintu sob harai nai. Kunba manuh aru group ase juntu aji bhi bhal moral bachai thake. Etu karone lagise ekta revival—ekta consciousness te moral bachaile society bhal thakibo. Family khan bacha khan logot time spend kori kena, moral bujhai dibo lage. School bhi value education ke serious banabo lage. Media te bhal kaam kora manu ke celebrate kori dikhabo lage.
Main change to hobole lagibo ami khan para. Juntu word ami khan use kori, juntu kaam ami khan kore, etu sob te reflect kori kena dikhai dibo juntu moral ami khan maintain kori ase na nai. Ami khan ek jon ek jon responsibility lobo age etu value ke bachabo karone.
Karone, moral na thaka somaj to direction na thaka ship nisena ase—danger te thake aru crisis te jabo. Tate etiya action lobile bhal hobo, nahoile piche time te sob late hoi jabo
Add Comment