Jodi ekta somaj ke Christian society ase koi, tate logot thaka manu kah life te Christian values—morom, respect, imaandari, komzor logot daya, humble hoa aru hosa kotha koa—etu khan reflect hobo lage. Kintu aji kali laga din te etu sob ulta hoi jai ase. Juntu somaj nijor ke Christian society koi kena identify kore, tai khan laga behaviour to besi Christian nahoi. Etu contradiction to ekta dangor warning signal ase.
Christian society mane nahoi sob Sunday church jabole, prayer koribo aru Bible dhori thakibo. Real Christian society to hobo jiman logote Christian teachings practical life te use kore. Kintu aji kali to enika dekha jai ase ki manu church jai, prayer kore, kintu outside te tai khan laga kaam aru behaviour to gossip, jhok mari kotha, jealousy, discriminate kora, aru alak manu khan ke judge kora. Aro dangor kaam te corruption, dishonest business, aru greed bhi chuli jaise. Enika behaviour to Christian faith ke insult kore.
Jesus Christ laga main teaching to ase morom—nijor logot, neighbor logot, aru enemy logot bhi. Kintu aji kali Christian society te morom komti hoi ase, aru tribalism, status, politics, aru division besi hoise. Church khan bhi enika divided thake, kunba manu ke besi support dibo, aru kunba ke side te rakhibo. Etu to Bible teaching logot ulta jai.
Hypocrisy bhi dangor problem hoi jai ase. Kunba manu ke dekha jai juntu outside te bhal kotha koi, Bible quote kore, kintu tai khan laga life te Christian values nai. Business te cheat kore, politics te corruption kore, aru family te bhi respect nai. Etu dekhi kena besi young generation ke faith para dur loi jai ase, karon tai khan realize kore ke sob manu Christianity laga naam use kore, kintu follow na kore.
Ekjon Christian ke daya, help kora aru forgive kora hobole lage. Kintu aji selfishness besi hoi jaise. Poor manu, orphan, widow, aru sick manu ke help kora kom hoi jaise. Manu khan nijor comfort aru benefit bisari thake, dusra manu laga problem ke ignore kore. Good Samaritan story to Sunday school te sunai thake, kintu practical life te khoi? Morom te action nai, khali word ase.
Maaff dibo lagibo, support kori thakibo lagibo—etu hoise Christian message. Kintu etya manu khan jodi ekbar mistake kore, tai ke judge kore, exclude kore. Restoration nai, khali condemnation ase. Christ to ahise save koribo karone, na ke judge koribo karone. Etu concept to bhal para bujhibo lage.
Etya time ahise self-reflection koribole. Ami khan ke etu question koribo lage—ami Christian naam use kore, naki Christian life follow kore? Church khan bhi preaching ke alawa example di kena leadership lobo lage. Family khan bacha khan ke Bible kotha logot bhal character aru value teach kori lage. Personal level te prayer, Bible reading, aru repent kora, nijor life change koribo lage.
Christianity to tradition nahoi, title nahoi—life style ase. Jodi ami khan kaam aru word te Christian moral nai, tate ami khan society ke mislead kori ase.
Christian somaj te Christian values reflect hobo lage—morom, imaandari, forgiveness, aru daya. Unchristian behaviour ke recognize kori kena, humbly correct kori dibo lage. Etu korile he ami khan ekta light hobo dunia karone, juntu Christ laga ichha ase.
Add Comment