October 7, 2026, 6:24 PM: Itu Environment, Forests & Climate Change laga Department para itu Wildlife Week observe kurishey, Mokokchung district tey, itu event tey Forest, Environment & Climate Change aru Village Guards laga minister – C L John toh special guest hisa buhi kena, kuntu toh hoiley Town Hall, Mokokchung tey celebrate kuria laga thakishey 6th October, 2026 tey.
Forest, Environment & Climate Change aru Village Guards laga minister – C L John para itu occasion tey kotha kuri kena koishey, itu toh hoiley moi khan sob laga responsibility asey, moi khan laga wildlife aru conserve aru bachai kena rakhiboley karney, nature para moi khan ke provide kuria toh. Moi khan toh hoiley headhunting kuria toh agey para chari di kena asey aji, Christianity aha pichetey, hoilebi moi khan itya bhi wildlife laga hunter hoi kena birai asey. Tai para koishey, itu practice toh hoiley rukhiboley lagi asey, aru conserve kuriboley laga opor tey kaam kuriboley lagi asey.
Tai duita Bosti khan ke appreciate kurishey, Peren tey aru 141 Bosti khan Mon District under tey, conserve kuria laga effort khan opor tey, tai para koishey, poila toh itu bosti khan laga community khan toh hoiley buji loishey, hunt nakuriboley nahoilebi namuraboley janwar khan ke, nahoilebi gaas khan nakatiboley aru tai khan toh hoiley ekta initiative loi kena agey barishey, wildlife bachaboley aru afforestation ke encourage kurishey.
