Dimapur, July 10: July 10 direk State Health & Family Welfare monitoring team khan Dimapur District jaga deh lok korise. Etu toh District Health Society Dimapur pethor deh sob health programmes laga performance toh saijabo nemide ase. Meeting toh Chapel Hall, District Hospital Dimapur jaga deh lowah thakise. Team ke Dr Vizolie Suokhrie, Director (Health), DH&FW, Nagaland led thakise.
First session time deh District Programme Officers laga alag alag health programmes, RCH-UIP, NVBDCP, RNTCP, DAPCU, IDSP nesana para tai khan laga respective programme activities aro performance toh present kora thakise. Etu present kora toh last three financial sal nemide thakise. DPO para tai khan kamiyaab howah aro tai khan dekthari powah opor deh janaise. Each health programme laga performance deh saijaile kena kotha kora thakise aro performance phal hobo nemide be kotha kora thakise.
Dr Vizolie Suokhrie, Director (Health) koise, health facility laga performance phal hobo ketiya staffs khan health services debo nemide hotai thaki. Tai para medical official aro health workers khan ke nejor laga duties toh thek para kuribole koise. Tai para district deh besi trainings, equipments, more awareness programmes, etc lobole koise. Kelay koile etu para health service deh phal hoo aro etu para be district laga health service performance phal hobo koise.
Dr. Atoshe Sema, SPO (RCH) para health units deh health service providers thaga laga kotha koise. Tai para khobor janaise ke sob district, institutional delivery aro ANC deh LAQSHAY suru howah para phal hobole. Tai koise NHP schemes pethor deh Government Health units deh register howah sob pregnant ama ke nutritional support deshe.
Dr Thanghoi Lam, SPO (NHM) toh Dimapur District Health Society laga pura puri performance opor deh kushi powah thakise. Tai para alag alag health protammes toh thek para bonabo nemide thek samai deh reports toh debole laga koise.Tai para be sob health units deh National Quality Assurance Standards (NQAS) nemide qualify hobole laga koise. Kelay koile health services laga quality opor deh kotha naolabo nemide.
Meeting deh Dr Antoly Suu, Deputy CMO toh chaired thakise aro welcome address toh Dr K Vikato Kinimi, CMO Dimapur para deshe. Dr Kheshito, MS, DHD para vote of thanks deshe.
Dr Kinimi, CMO be district deh health delivery toh phal hobo nemide Director aro State officials logode kotha kora thakise. Tusara officials khan meeting deh ahha khan toh Dr Niesakho Kire, Deputy Director (NVBDCP), Dr W Nchumbemo Ezung, SNO (NCD), Dr Ritu Thurr, SIO, Dr Nyan Kikon, SNO (IDSP), CMO aro MS Dimapur under deh Medical officers aro staffs thakise.
Add Comment