Kohima, 25 July: July 25 direk Directorate Agriculture jaga deh review meeting lowah time deh Minister for Agriculture & Cooperation, G. Kaito Aye kotha korise. Minister koise, department toh state laga manu nemide ase aro pura Nagaland laga manu khan ke laab pabo nemide ase.
Tai koise, Government of India toh Agriculture sector deh besi phak sai ase. Etu para department khan alag alag programmes, schemes loi kena thek para jolabo lagi.
Kaito para opai toh kon ke be nadi kena nacharibo koise aro tai sob district aro sub divisions deh lok kuribo, bosti manu khan logode kotha kuribo aro dekthari pai thaga ke saijabo koise. Tai para be districts aro sub divisions ke hosha laga kaam aro kamiyab howah opor deh jaaidebole koise. Maike khan hesha lobole laga toh bechide narakhibo aro etu nemide SHGs toh othabo lagibo aro higher level nemide mon dangor kuribo lagi koise.
Tai para sob employees khan neom phal para thakibo lagi koise kelay koile nejor laga department majode dekthari ola para dekthari napabo nemide. Sob facilities toh government para de ase etu para nejor laga duty aro kaam toh thek para mon dekena kuribo lagi koise.
APC & Principal Secretary, Agriculture, N. Hushili Sema, IAS para tai laga short speech deh judi farm phal hoise koile manu khan be phal hobo koise. Tai para officers khan mela meli thakibole aro duties thek para kuribo nemide koise. Department laga function phal hobo nemide employees majode relation toh gara thakibo lagi koise. Tai para department khan ke sob kaam laga khobor toh thek samai deh janidebole koise kelay koile thek deh laab pabo nemide. Additional Director, Agriculture, C. Peter Yanthan para be department opor deh power points presentation deya thakise.
Add Comment