October 19, 2020. India para Bangladesh te jaa laga flights October 28 darik te aro kolibo aro etu samay hoshari kam te peraboli koishe. Etu flights toh 5 Indian cities para Dhaka logot connect koribo, koikena Saturday din, Dhaka laga Indian High Commission para janai thishe. Soru samay, hafta te tuita desh para 5,000 passengers perabo, etu khobor toh Civil Aviation Authority of Bangladesh (CAAB) Chairman Air Vice Marshal M Mafidur Rahman para Sunday din te junaishe. Tai, koishe ke, passengers khan nemite 3 wala desh te jabole facility nai. Aro flight te naja agae passengers khan Covid-19 testing lobo lage koishe. October 9 darik te, Bangladesh te Indian High Commission para Bangladeshi citizens nemite online visa application services toh soru hoishe koikena junai thishe. Etai nemite, visas toh 9 categories te thibo, etu pithor te medical, business, employment, journalists aro diplomats thakibo. Bangladesh para 3 airlines toh hafta te 28 paar perabo, aro 5 Indian airlines toh be eman paar thakibo, koikena Bangladesh foreign ministry para koishe. Bangladeshi airlines khan toh Biman Bangladesh Airlines, US-Bangla Airlines, aro NOVOAIR, ase aro Indian airlines khan toh Air India, Vistara, IndiGo, SpiceJet, aro GoAir, thakibo. Biman Airlines para Dhaka-Delhi-Dhaka aro Dhaka-Kolkata-Dhaka rasta te perabo, aro US-Bangla Airlines para Dhaka-Chennai perabo aro NOVOAIR para Dhaka-Kolkata-Dhaka rasta te perabo. Indian airlines toh Dhaka-Delhi-Dhaka, Dhaka-Kolkata-Dhaka, Dhaka-Chennai-Dhaka, aro Dhaka-Mumbai-Dhaka rasta te peraboli koishe. Normal din te, Bangladesh manuh 3,500 hotai din perai thakishe. Etu pithor te 10% khan medical kam nemite perai koishe. India te foreigners medical kam nemite aha toh Bangladesh para 45% ase, koikena India-Bangladesh Chamber of Commerce aro Industry para koishe. January 2018 aro March 2019 samay pithor te 13.7 million foreigners khan India te elaj koriboli ahikena ase koishe.
Add Comment