Headlines • Kohima • Nagaland

Nagaland te ‘Community transmission’ nai: Health Dept. COVID cases otha te monchinda ase

October 28, 2020
14 Views

Kohima, 28 October: Department of Health and Family Welfare, Government of Nagaland para  “community spread” thakise koilebe Nagaland te COVID-19 laga “community transmission” toh nai koise aro public khan etu tuita terms te confuse nahobole koise.

Wednesday, October 28, 2020, Directorate of Health and Family jag ate press briefing te Principal Director, H&FW, Dr. Vizolie Suokhrie para State te besi phak Kohima aro Dimapur te COVID-19 cases otha opor te monchinda howa janaishe.

Dr. Vizolie para August te positive cases laga number toh thek thakise koise. hoilebe September kothom howa aro October suru howa para positive cases aro symptomatic cases laga number otha toh ase koise. tai para be etu samai te mora rate (mortality rate) toh othise koise.

Unlock laga process logode, Dr Vizolie koise, manu khan toh complacent/satisfied hoise aro proper measures – mask laka aro social distance maintain kora rokhise. Besi manu khan testing koribole mon nahowa hoise aro tai khan symptoms opor te deri aro late stage ektum serious howa time te he khobor kori.

Dr Vizolie para be COVID-19 para recover howa manu khan re-infection hobole chance toh ase koise aro tai khan nejor ke satisfied nahobole koise. Winter suru howa logode, situation be ektum serious hobo judi public khan satisfied/complacent hoile koise. Tai para be besi jama howa wedding aro tusara festivities opor opor te ektum monchinda howa janaishe.

Dr Vizolie para be stigmatization aro discrimination laga dekthari thaki thaka opor te monchinda howa janaishe.

Principal Director para joldi testing aro diagnosis nemide kaam howa koise. Tai para be phal treatment toh nai aro prevention toh phal hatiyar ase koise.

Dr Vizolie para public khan preventive measures –haat thola, physical distancing aro masks laka toh gara para manib ole koise. Dr Vizolie para be public khan Government para deya besi SOPs te gara para manibole koise. Tai aro koise, COVID-19 kelaaf fight toh ekta “collective social responsibility” ase. Press briefing samai Dr Vizolie  logode department laga tusara officials thakise.