Afghan: Kabul University hamla kora manuh thurishe

Kabul, Afghanistan: November 14, 2020. Etu moina olop din agae te terrorists khan para Kabul University te hamla kora “mastermind” ke Afghan forces para thurishe koishe. Etu din terrorists khan para classrooms pithor te jaikena students besi jun ke moraishe, koikena Saturday din sobse tangor  officials para janai thishe. “Kabul University te hamla kora manuh toh thurishe,” Vice President Amrullah Saleh para Facebook Page te junaishe. Hamla te tin(3)  jun manuh thaka toh larai te morishe aro etu hamal toh terrorist Adil para plan kora thakishe, Mr Saleh para koishe. Adil ke toh Haqqani network khan para thala ase. Mr. Saleh para thura manuh laga khobor toh he janaishe. Adil toh Islamic sharia law laga student thakishe aro tai toh Panjshir province para ase, hoilebi tai laga family toh Kabul laga bahar te thaki ase , Tai aro koishe. “Adil toh 3 saal neshina harikena ase, tai war te larai koribo nemite training loboli jaishe, hoilebi etu khobor toh mesa ase”  koikena Mr  Saleh koishe. Adel logot sawal kora samai, tai para koishe ke, etu hamla koribo nemite Haqqani network khan para bantok aro dosura saman thishe. Haqqani network toh  Taliban logot melikena ase, aro tai khan besi din para Western forces aro civilians khan logot hamla kori ahishe aro Washington para tai khan logot terrorist group ase janaishe. Etu din hamla kora bechete, Mr Saleh aro dosura tangor officials para University te hamla kora nemite Taliban khan logot botnam korishe. Hoilebi, hamla kora toh ISIS group para nam loishe. University te hamla nakora agae te, ISIS khan para aro Kabul laga western district,  educational centre osor te tangor suicide bombing korikena thakishe, etu samai komti hoilebi 24 manuh morishe koishe.