Japan para desh manuh ke free Vaccine thibo ase

Tokyo: December 2, 2020. Wednesday din te Japan para bill ekta passed kora pithor te tai khan laga manuh sob ke free coronavirus vaccine thiboli koishe. Tai khan laga desh te cases besi othi thaka nemite. Etu bill pithor te government para Japan laga 126 million manuh laga vaccine dham toh thiboli koishe. Etu fesla toh parliament laga lower house para cleared kora beche  upper house para approved kori thishe. Japan toh pharmaceutical giant Pfizer para Covid-19 vaccines toh 60 million manuh nemite paikena ase aro biotech firm Moderna hath para 25 million manuh nemite paikena ase koishe. Khobor para aro koishe ke, AstraZeneca laga vaccine toh aro 120 million paboli ase. United States aro Europe te Pfizer aro Moderna khan para emergeny samai joboli approval magikena ase. Clinical tests para tai khan laga vaccine toh bahl thikaishe. Etu bill passed kora toh, Japan laga Prime minister para koishe ke, desh toh virus oper te “maximum alert” thakiboli koishe aro medics khan para hospital ke warn thikena ase. Japan te Covid-19 bemari toh besi tangor olanai. Etai dak te 150,000 bemari cases neshina ase aro 2,100 manuh morikena ase, etu oper te dosura desh khan beshina strick lockdown korikena nai. Hoilebi, etai 3^rd wave ahi ase, olop hafta agae para hotai din laga bemari cases toh besi othiase . Tokyo laga governor para kam nathaka te bahar najaboli koishe aro motu business kora khan logot jolti bondh koriboli janaishe.