Pakistan: Oxygen komti nemite Covid bemari 7 jun morishe

December 7, 2020. Pakistan te oxygen supplies komti howa nemite coronavirus bemari manuh 6 jun morishe. Northern city Peshawar te government hospital te hoishe, etu samai mora manuh laga ghor manuh khan para hospital te besi motob mangishe koishe. Oxygen thiri howa nemite, 200 neshina bemari manuh khan besi gonda nemite rokai thishe. Hospital officials khan para oxygen komti nemite company khan logot botnam korishe, hoilebi, staffs besi jun ke suspended korikena ase. Etai Pakistan te notun wave nemite coronavirus cases logot larai kori ase. Pakistan te sob melaikena bemari cases toh 400,000 oper hoikena ase aro 8,000 oper manuh morikena ase koishe. Local media para koishe, Saturday din para Khyber Teaching Hospital te konuba problems nemite fresh oxygen cylinders toh supply nahikena ase. Mureed Ali, kaun laga ama toh Covid-19 para bemar ase, tai para BBC logot koishe, “hospital pura te, bemari manuh ke pachabo nemite medical staff manuh ke motob manki ase. Tai aro koishe, oxygen thaka jaga te konuba bemari manuh khan ke emergency room te loikena jaishe. Hoilebi, etu beche oxygen kotom howa beche, bemari manuh besi morishe aro konuba besi serious hoishe. Hospital staff khan para bemari manuh laga ghor manuh ke osygen toh nejor para keniboli koishe, koikena Ali para janaishe, aro etu konuba manuh para he parishe. Government hospital laga spokesman  para BBC logot koishe ke, 5 jun manuh mora toh coronavirus ward para thakishe aro ekta toh intensive care unit para ase. Mora manuh khan toh sob jawan khan ase koikena officials para janaishe. Hospital laga director aro dosura staffs manuh khan ke suspend korikena ase.