Nigeria school te hamlaa

December 13,2020. Western Nigeria laga secondary school te hamla korikena 100 students khan phui para harikena ase koishe. Hamla kora manuh khan toh motorbikes te ahikena haw ate gooli marishe, etu samai manuh khan alag-alag jag ate pulaishe, koikena witnesses para koishe. Friday din, Katsina state te Government Science Secondary School te hamla korishe, etu samai 800 students khan thakishe. Saturday din military para koishe, hamla kora manuh khan toh jungle te lukai thakishe aro tai khan logot gooli mara-mari korishe. Officials para koishe, students khan pithor te kaun be jokom howa nai. Nigerian President Muhammadu Buhari para hamla kora toh botnam korishe aro school logot students oper te pura audit koriboli koishe, keman jun harishe janibo nemite. Kankara jaga te school osor te boha manuh khan para BBC logot koishe, tai para Friday din 23:00 (22:00 GMT) samai gooli mara honishe aro hamla kora manuh toh 1 gonda oper thakishe. School te Security sepai khan para police naha akhe te hamla kora manuh khan logot larai korishe, koikena officials para koishe. Saturday din police para statement te koishe, gooli mara-mari kora samai, konuba hamla kora manuh toh pulaishe. Students khan be school laga fence oper para pulaboli parishe koishe. 200 students neshina khan pula toh napaikena ase aro konuba wabas ahishe. Witnesses para aro kowa toh hamla kora manuh para students konuba ke loikena jaishe. Police officer 1 jun toh gooli para jokom paikena hospital te loijaishe, police para koishe. Saturday din local manuh aro police khan melikena students khan ke persaria soruh korishe. Governor of Katsina, Aminu Bello Massari para desh te boarding schools bondh koriboli hokom thishe. 2014, saal te 270 maiki manuh ke militant Islamist group Boko Haram khan para north-eastern Nigerian town Chibok, school para kidnapped korishe. Kaun group khan para be Katsina school te hamla kora toh nam loikena nai koishe.