French President Emmanuel Macron logot COVID-19 positive paishe

Paris, France: Thursday din French President Emmanuel Macron logot Covid-19 positive tested paishe koikena presidency para koishe, aro etai tai aha hafta dak ekla thakiboli koishe. “president ke aji Covid-19 positive tested korishe,” statement para janaishe. Macron toh etai, national regulations hesab te “7 din nemite ekla bohibo. Tai toh ekla alag para kam koribo,” koishe. Duniya laga heads state aro government manuh pithor te French president logot Covid-19 thura toh tai be ekta ase, etu oper te British Prime Minister Boris Johnson aro US President Donald Trump logot be bemari thurishe. Etu hafta akhe te, France para coronavirus second wave thaka samai restrictions toh komti korishe, hoilebi bemari rate toh oper te ase koishe. Virus pheli thaka toh rokabo nemite, France pura te 8 pm para rati pura curfew ase, etu samai restaurants, cafes, theatres aro cinemas toh bondh korikena ase. France te bemari soruh samai para loikena etai dak te 59,300 manuh morikena ase, koikena officials figure para janaishe. Wednesday din ekla te 17,000 notun cases paishe. Christmas samai manuh khan peraboli besi tangor bapana te ase koishe.