April 21, 2021. Mizoram government para Covid-19 bemari spread kora rokabo nemite Aizawl aro dosura district headquarters te 7 din lockdown junaishe. Hoilebi, Monday rati te order aro guidelines issue kora te ‘lockdown’ ase toh kowa nai, hoilebi, koishe ke, Aizawl municipal area aro dosura district headquarters te April 20 darik para April 26 dak nejor ghor te thakiboli janaishe. Hoilebi, public aro bosti pithor te gari toh Village Level Task Force (VLTF) nahoile Local Level Task Force (LLTF) ke permission loikena perabo pareh. Mizoram te Aizawl melaikena 11 districts ase. Notun guidelines hesab te religious places, educational institutions, public parks, picnic spots, movie theatres, gymnasiums, community halls, restaurants, shopping complexes, malls aro dosur resort jaga toh etu samai jaga sob te bondh thakibo. Hoilebi, school board examinations, all India level aro dosura recruitment exam toh kowa neshina jai thakibo. Funeral aro wedding te manuh laga number toh 30 jun te fixed korishe.
Lengpui airport aro inter-state borders te dosura state para ayaa khan Rapid Antigen Test negative result thakiboli laga nehoile nejor 7 din nemite home isolation koribo lage. 7 din thaka beche tai khan ke aro RT-PCR test loikena negative paishe koile ghor te isolation nalaki. Hoilebi, manuh khan ayaa beche 10 din oper state te bohile aro etu samai entry te screening kora samai negative test hoile, etu manuh khan ghor te 7 din isolation te thakibo. Kaun manuh state te 96 gonda nemite visit koribi, tai khan quarantine koriboli kam nai, hoilebi tai khan hath te Covid-19 negative certificate thakiboli lake aro etu report toh ICMR recognized RT-PCR aro Truenat nahoile CBNAT labs laga Specimen Referral Form hobol lage. Certificate toh state te ayaa beche 96 gonda oper nathakibo lage koishe.
