Doyang Rhythms “Music By The Lake” loise

Wokha, 26 April: Acoustic Club, Wokha para Task Force Music & Arts (TaFMA) logote melikena Wokha te tui din music festival toh 23^rd aro 24^th April 2021 te theme “Doyang Rhythms, Music by the Lake” logote manaishe Doyang Tourist Resort Area jaga te. Advisor to Chief Minister, Nagaland, Abu Metha para occasion toh special guest hisab te grace korise. Suru kora program te kotha kora te, Abu Metha para Acoustic Club, Wokha aro TaFMA ke dhanyabad korise kelay koile eki logote ahise kena event toh hosha bona nemite. Aro fanstastic venue logote music festival toh ahibole sal besi dangor event logote dangor scope thaka bhabona janaishe. Aro pura region aro deshe te ekta premier music festival hobole potential ase koise. Metha para scope aro potential toh ase, jaga toh ektum phal aro ami khan besi talents thaka jani koise. Acustic Club aro Wokha district lag young manu khan ke music festival toh dangor hobo nemite ensure koribole koise. Tai para Nagaland te besi potential toh Arts aro Music laga field te ase koise. Tai para be State Government toh TaFMA laga guidance logote besi initiative loi ase koise.

Metha para janaishe Nagaland para agae par Asia Music festival summit toh Konia te lobole nemite. Participants, experts, resource persons, music bands aro renowned musicians toh etu global event te hisha lobo koise. Asia ekala para nahoi kena tusara desh khan be music festival te hisha lobo koise. Tai para be Naga music laga best toh Konia te Asia Music festival samai te dekhabo koise aro etu nemite TaFMA para best musicians toh Wokha para junibole ase koise. Tai para musician khan dukh koribole aro nejor laga sabona kamiyab hobo nemite talent aro ability jolabole koise.

TaFMA, Advisor, Theja Meru para Acoustic Club, Wokha aro GoN  te dhanyabad korise kelay koile eki logote etu music festival toh hosha bona nemite aro ahibole din Nagaland laga districts te enaka events toh besi olabole aro local musicians aro artists ke opai debole bhabona janaise. Music festival te Wokha para 15 local artists aro bands aro ekta guest band hisha loise.