Rajasthan Chief Minister Covid(+v) thurishe

New Delhi: Rajasthan Chief Minister Ashok Gehlot para aji tai ke novel coronavirus positive thurishe koikena junaishe. Twitter te Mr Gehlot para koishe ke, tai itya bhal wala ase aro ghor te isolation te bohi ase. Wednesday din te 69 umer Congress leader laga maiki ke positive test thura nemite tai alag bohi ase. “aji ami laga Covid test report toh positive ahishe. Ami logot eku symptoms nai aro itya bhal wala ase. Ami Covid neum jolaikena isolation te kam kori thakibo,” koikena Mr Gehlot para koishe. Wednesday din te Mr Gehlot para koishe ke, tai laga maiki Sunita Gehlot toh asymptomatic ase aro neum hesab te ghor para elaj kori ase. “ami hoshari nemite isolation te thakibo aro COVID-19 meeting toh doctors aro officials khan logot hotai 8:30 pm te thakibo,” Mr. Gehlot para aro koishe. Chief Minister para Rajasthan te COVID-19 halat nemite hotai offline te officials khan logot khobor kori ase.  Rajasthan te Wednesday din dak COVID-19 bemari para 120 manuh morikena ase aro 16,613 positive cases ase, sob melaikena 3,926 mora khobor aro aro 5,63,577 bemari cases ase koikena official data para janaishe. Khobor hesab te active cases toh 1,63,372 ase koishe. Itya dak state te 3,96,279 Covid-19 bemar manuh khan bhal hoikena ase.