Kerala te May 8-16 pura lockdown

May 6, 2021. Thursday din Kerala government para state te Covid-19 cases othi-thaka nemite pura lockdown koriboli junaishe. Restrictions toh state laga southern jaga te May 8 darik para 16 darik dak thakibo koishe. Olop din akhe te be state te virus pheli thaka rokabo nemite restrictions neshina lockdown korikena ase. Chief Minister Pinarayi Vijayan para koishe ke, bemari cases besi othi-thaka nemite restrictions toh aro besi kara wala koribo. Tai para koishe ke, itya state toh besi serous te jai ase etu nemite lodges aro hostels jaga toh Covid First Line Treatment Centres (CFLTCs) bonaboli ase. Government agencies neshina Consumerfed aro Supplyco, political parties, NGOs, desh bahar te registered hoikena thaka Malayalee Associations aro private agencies toh itya relief agencies neshina koriboli ase. State’s Health Department hesab te, 24 gonda pithor te 41,953 Covid-19 positive cases thurishe. Itya state te active cases toh 3,75,658 hoikena ase aro etu samai test positivity rate (TPR) toh 25.69 per cent te ase. Essential services pithor te banks aro vaccination centres toh lockdown thaka samai Covid protocols thakina kuliboli janaishe. State te Banks toh 2 pm dak kula thakibo aro public nemite 1 pm dak thakibo.  Government offices neshina state aro central te kali emergency services sai thaka ke Covid guidelines maniboli janaishe. Shops te essential items toh kulibo hoilebi ek paar te manuh besi jama nakoriboli junaishe. Hotels aro restaurants te kali home delivery aro loikena jaboli paribo, freight, air aro rail te pera manuh nemite eku  restrictions nai koishe.