India: Japan para $14.8 Million emergency motob thishe

Tokyo: India desh para COVID-19 bemari logot larai kori thaka samai Japan para emergency samai jolaboli nemite USD 14.8 million neshina para motob thishe aro etu oper te extra medical supplies be thishe, koikena khobor toh Japanese foreign ministry para janaishe. India te 50 din neshina thakina 1 din pithor laga sobse komti 1,52,734 cases thurishe, etu melaikena India te 2,80,47,534 cases hoishe. Hotai din 3,128 manuh mori thaka te sob melaikena 3,29,100 hoishe, koikena Monday din te Union Health Ministry laga data update hesab te janaishe. Government of Japan para India logot Emergency Grant Aid 14.8 million US dollars toh itya India te COVID-19 bemari samai thiboli fesla korishe, koikena etu khobor toh Japan laga foreign ministry para statement te junai thishe. Japan toh India laga sathi aro partner te kara korikena ase, tai dukh samai COVID-19 bemari logot larai kori thaka te extra emergency motob kori ase aro besas ase ke Japan laga motob para India te COVID-19 bemari halat toh  rokaboli paribo. Etu motob kora te, aro extra 1,000 ventilators aro 2,000 oxygen concentrators toh India ke United Nations Office for Project Services (UNOPS) laga hath para May 5 darik te USD 50 million motob deya junaikena ase. Etu khobor nemite 1,800 ventilators aro 2,800 oxygen concentrators toh Japan para India logot olop din akhe te thishe, koikena May 28 darik ministry para statement te janaishe. Etu moina olop din akhe te be Japan para India logot 300 oxygen concentrators aro 300 ventilators thikena ase. May 5 darik te Japanese Foreign Minister Toshimitsu Motegi para Indian counterpart S Jaishankar logot koishe ke, Japan toh India ke extra USD 50 million grant assistance thiboli tayar ase koishe. India toh second wave samai coronavirus bemar logot larai kori thaka te 40 countris neshina para medical supplies oper te oxygen saman para motob korikena ase. Japan jarikena dosura tangor countries kaun para motob korikena thaka toh US, France, Russia, Germany, Australia, Ireland, Belgium, Romania, Luxembourg, Singapore, Portugal, Sweden, New Zealand, Kuwait aro Mauritius ase.