Hojai: Doctor assault case te aro tui(2) jun samil

June 6, 2021. Central Assam’s Hojai district, Covid hospital te olop din akhe junior doctor logot hamla kora connection te aro tui(2) jun manuh ke thurishe, etu pithor te maiki 1 jun be samil ase koishe. Fultali Model Hospital te Covid-19 bemar para mora nemite, tai laga ghor manuh khan para junior doctor Seuj Kumar Senapati logot besi beya para marishe koishe. Police para etu incident howa beche 24 manuh ke thurikena ase. Saturday din Hojai Police para aro tui(2) jun ke thurishe, etu melaikena 26 jun ke thurikena ase koishe. Saturday din Assam chief minister Himanta Biswa Sarma para jaikena doctor Senapati ke Gauhati Medical College & Hospital (GMCH) te tai laga halat saboli visit korishe.  Friday din te National Human Rights Commission (NHRC) para Assam government laga report hesab te action loboli koishe. Giyasuddin, Covid-19 bemar manuh toh Udali jaga laga ase aro tai toh Tuesday din hospital te 10 a.m. samai morishe koishe. Giyasuddin toh ajanak para mori jowa nemite tai laga ghor manuh aro konuba manuh kusa hoikena hospital laga doctor aro staff khan oper te hamla korishe. Etu oper te etu manuh khan para hospital laga furniture aro dosura medical saman beya korishe. Etu beche police ahikena doctor  ke pachaishe koishe.