Mizoram: Class-XI admission fees 30% komti korishe

 June 8, 2021. Mizoram education minister Lalchhandama Ralte  para janishe ke, government para sob government schools te students kaun class-XI admission loboli ase, etu students nemite admission fees toh 30 per cent komti koriboli koishe. Minister para etu fesla junai deya toh class-10 results ola beche parents aro students khan Covid-19 bemari samai dukh hoi thaka nemite ase koishe. Monday din Aizawl te government Mizo Higher Secondary School bahar te function samai Ralte  para koishe ke, “Mizoram te thakai manuh covid-19 bemari samai dukh powa nemite, state government para government higher secondary schools, adhoc aided higher secondary schools te class-XI students nemite admission fees toh komti koribo,” koishe. Students kuan khan Class-XI te admission loboli ase, etu students nemite admission fee toh 30 per cent komti koribo. Minister para aro private schools logot koishe ke, itya bemari samai manuh khan besi dukh te thakai nemite admission fees toh komti koriboli janaishe. Tai para aro parents khan ke kowa toh tai khan laga bacha ke government schools te admission loboli janaishe, keli koile qualified teachers ekla thaka nahoikena tution fees be charge nakori koishe. Etu samai alag-alag student bodies, organizations aro Central Young Mizo Association (CYMA) para state government logot itya dukh samai students nemite admission fees komti koriboli fesla junai deya toh besi tangor dunyawad janai thishe. June 3 darik te, Mizoram Board of School Education (MBSE) para (MBSE) class-10 examinations results junaishe, etu examination te students khan 82.43 per cent kamyaab paishe. 1978 saal beche first board examination loikena aha te 1^st sobse besi pass percentage ase koishe. Etu exam toh Covid-19 bemari samai Covid-19 hoshari neum te exam toh April moina te offline te loishe. Schools sob para besi bhal exam thishe, hoilebi 7 schools pithor te 1 government school para class-X board examination te 1 student be passed howa nai. Ralte  para koishe ke, etu 7 schools logot class-10 examinations te blank pass percentage nemite show cause notices thishe koishe.