Delhi te IAS Officer neshina kora nemite thurishe

New Delhi: Monday din South Extension II te, 40 umer manuh ek jun para IAS officer neshina kam kora nemite thurishe, koikena Delhi police para khobor toh janaishe. Etu manuh laga nam toh Abhay Bahl ase aro tai toh Noida Sector 15A te thaka manuh ase koishe. Police laga khobor hesab te, ek jun manuh toh Samsung showroom te ahikena IAS officer ase koikena mobile phone Rs 1 .4 lakh laga daam toh fake cheque thishe koishe. Etu khobot honikena, June 19 darik te police laga team ekta Ring Road Samsung showroom South Ex-2 te jaikena etu manuh ke thurishe koishe. Tai logot check kora samai, fake/forged blank cheque aro tai para call kora mobile phone toh paishe. “inquiry kora samai, etu manuh para toh Samsung Showroom te employee logot phone call korishe aro tai ke Samsung Company laga senior officer para kotha koi ase koikena tai laga sathi ek jun IAS officer toh saam te ahikena notun mobile Rs 1.4 lakh laga daam toh cheque para loboli ase,” koikena police para janaishe. Aro koishe ke, ketai employees para seniors logot etu kotha toh janaishe, phone kora toh mesa thakishe. Etu beche saam te, etu manuh toh showroom te ahikena tai nejor ke IAS officer ase janaishe, etu beche cheque toh thikishe aro tai laga nam be thaka nai koishe. Verification korikena etu manuh para olop din akhe te be Noida te senior officer neshina korikena ase koishe. Etu manuh oper te Hauz Khas police station te Indian Penal Code (IPC) section 419/420 pithor te case registered korishe koishe.