Meghalaya: MLAs jarikena jowa toh bhal nahoi

Meghalaya: Meghalaya Congress para koishe ke, 12 MLAs kuan para Congress jarikena Trinamool Congress (TMC) joined korishe, etu manuh khan para state laga manuh ke dukai deshi. Shillong  te media logot kotha kora samai, Meghalaya Congress chief Vincent Pala aro state party in-charge Manish Chatrath para janaishe, “MLAs kaun para Congress party jarikena jaishe, tai khan toh state laga manuh ke dukai deshi.” “Meghalaya manuh para Congress ke morom korikena state te sobse tangor party bonaishe, etu MLAs khan para dukai deshi,” koikena Meghalaya Congress in-charge Manish Chatrath para koishe. Tai aro koishe ke, “2023 saal te Meghalaya manuh para etu khan logot tangor jawab thibo.” Former Meghalaya chief minister Mukul Sangma aro 11 dosura Congress MLAs khan ke Thursday saam te TMC te samil korishe. “etu toh Meghalaya manuh nemite notun soruh ase, aha din te state toh etu logot be tangor wala bonaikena jabo. Ami khan para Meghalaya Congress laga 12 MLAs kaun para Trinamool Congress family te samil hoishe wabas ahiboli welcome kori ase,” TMC delegation kaun para Shillong te ekta ceremony thaka samai koishe. Olop din akhe former Meghalaya chief minister Mukul Sangma aro dosura 11 MLAs para TMC join koriboli fesla lowa te kowa ase. “moi khan Trinamool Congress (TMC) join koriboli toh besi din para kotha kora beche ase,”koikena Mukul Sangma para Thursday din Shillong te koishe. Mukul Sangma para aro koishe ke, Congress party toh India laga sobse main opposition party hoikena duty koriboli failed hoishe. “etu nemite moi khan Trinamool Congress logot meliboli fesla loishe,” koikena Shillong te former Meghalaya CM Mukul Sangma para janaishe.