Mizoram te African swine Fever para 16 gaori morise

Aizawl, 18 April: Monday te state animal husbandry and veterinary department laga officials para Mizoram te highly contagious disease African Swine Fever (ASF)  nemite aro 16 gaori toh Sunday te morise koise. Mizoram Animal Husbandry and Veterinary Department joint director (Livestock Health) Dr Lalhmingthanga  para February to Sunday tak ASF nemite 770 gaori/pigs morise koise. February bechae para 205 gaori toh suspected ASF nemite morise aro 124 gaori toh gaori bemari para agae naphelibole nemite hataideya/moraideya thakise koise. ASF laga suspect te mora gaori laga samples toh jama korise aro gaori mora laga ashol karan te confirm nakori kena ase koise.  February te notun gaori mora khobor bechae para etiya tak ASF ola te nama/komti howa toh nai koise. February te mora gaori laga samples toh jama kora thakise aro March te ASF nemite confirmed kora thakise koise.  ASF para aji kali jarta district- Aizawl, Champhai, Lunglei aro Saitual te 17 bosti aro localities te affect kori ase koise.  Aizawl, Saitual, Kolasib, Lawngtlai, Champhai aro Khawzawl districts para 25 bosti aro localities te ASF para mora nahoile suspect te mora khobor hoise koise.  State government toh ‘National Action Plan for Control, Containment and Eradication of African Swine Fever hisab te gaori bemari phela te rokhabole nemite besi kosish kori ase koise.  Mizoram te tusara states aro desh khan para goori aro gaori mangso import kora toh April 2 te bondh kora be korise koise. Jowa saal ASF ola nemite 33,417 gaori mora thakise koise. Etu mora para poisa toh Rs 60.82 crore te loss hoise koise. Aro eki saal te bemari phela te rokhabole nemite sob meli kena 10,910 gaori moraideshe/culled koise.