J&K te Terrorist para Railway sepia moriashe

SRINAGAR: Jammu & Kashmir’s Pulwama district te terrorists para tuita(2) Railway Protection Force ke goole para moriashe, koikena khobor para janaishe. Head Constable Surinder Singh aro Assistant Sub-Inspector Devraj ke Kakapora te tea stall osor te moriashe. Tai jun ke joldi hospital loikena jaishe, hoilebi doctors para Surinder Singh toh morikena pongchise koishe. Etu jaga te hamla kora logot operation soruh korishe, hoilebi etu samai hamla kora manuh toh jaga para pulaishe, koikena police laga khobor hesab te janaishe. April 24 Kashmir te Prime Minister Narendra Modi’s visit nemite terrorist hamla khobor besi hoi ase. Prime Minister Narendra Modi para Jammu te tangor rally ekta te kotha koriboli ase aro etu samai hazar panchayat members para Panchayat Raj Din maniboli ase koishe. Jowa tin(3) hafta neshina para Kashmir Valley te terrorists para security forces aro civilians oper te besi hamla kori ase. Etu moina pithor te etu 9^th wala hamla kora ase. Jammu & Kashmir te bahar desh para kam koriboli aha aro indigenous Kashmiri pundits ke morai-deya hatsa besi othi-ase koishe. Etu oper te panchayat members ke hamla kora besi hoishe, jowa moina 4 panchayat members ke terrorists khan para hamla korikena ase. Friday din te sarpanch/elected village chief ke Baramulla district te terrorists para hamla kora te morishe. Manzoor Ahmed Bangroo ke osor te goole marishe. Tai besi beya jokom powa nemite hospital te loikena jowa samai rasta te morishe, etu toh 6 hafta pithor Kashmir te 4^th panchayat member ke morai-deya ase. Wednesday din terrorists para migrant worker -driver ke Kulgam district te moriashe aro dosura hatsa ekta te Satish Kumar Singh ke goole marikena hospital te jowa samai morishe. October moina, 5 din pithor te 7 civilians ke morai- deya  te Kashmiri Pandit,  Sikh aro tui(2) jun non-local Hindus samil thakishe.