Assam Police Constable hang kurikina

Guwahati, March 12 : March 12 te Assam laga Cachar district te ekta senior police constable tu ekta Battalion camp te hang kurikina thaka paisey.

Sources laga hisap te etu constable tu Cachar district laga Kathal area fale 6^th Assam Police Battalion camp laga ekta room bhitor te hang kurikina thaka paisey.

Etu murija constable laga naam tu Biplab Chakraborty asey. Aro tai tu Cachar district te thaka manu asey.

Tai laga gao tu room bhitor te hang kurikina thaka pa pichetey Chakraborty logotey ekey  kaam kora manu khan para higher authorities khan ke khobor disey. Aro etu authorities khan para police  ke khobor kurisey.

Police khan camp te pungchisey aro etu jawan laga dead body tu baramat kurisey.

Etu pichetey etu mura manu laga body tu post-mortem kuribole karney Silchar Medical College and Hospital (SMCH) te loijaisey. 

Chakraborty para enaka dangor kadam utha laga pichetey ki karon asey etu tu janibole baki asey.

Aro etu mamla tu suicide laga na murder kora laga asey etu janibole police para investigation suru kuridisey.

Etu laga agetey Tinsukia district te ekjun jawan para tai laga service te chola haatyar para nijor ke guli marikina nijor laga jaan loisey.

Sources para koisey ki etu nijor ke guli mara jawan Ashok tu Doom Dooma ARC te kaam kuri thakise. Tai para tailaga room te nijor ke guli marikina moraidisey.

Etu jawan manu laga body ke Tinsukia Common Medical clinic para post-mortem kuribo karney loijaisey.