Imphal, July 16 : European parliament para taikhan laga ekta session te Manipur te hoi thaka jhamila laga mamla utha nimitey taikhan ke condemn kurikina Manipur legislator Rajkumar Imo Singh para European parliament ke India laga nijhi mamla te misa misi interfere kora nimitey slam kurisey.
Imo Singh para July 16 te release kora ekta press note te enaka koisey, “ India tu duniya te sobsey dangor democracy asey aro India laga nijhi mamla te kuntu desh bi gusibole haak nai. India laga sarkar para officially safa safi koisey ki Manipur te etya chuli thaka jhamila tu pura puri nijhi mamla asey aro taikhan etu mamla te gusa tu swikar kuribole napara laga asey aro etu para taikhan laga colonial bhabna(matlab taikhan laga tarika aro faisla tu hey India laga tarika aro faisla para behtar asey koikina bhabna rakha) tu dikhai di asey. European parliament ke taikhan laga nijhi mamla te hey kaam kuribole karney bhal para samjhai kina asey. Ami para etu kobole mon asey ki taikhan para taikhan laga homoi tu Russia Ukraine war nohoilebi France te aji kali hoithaka gondogol ke thik kuribole nimitey cholabo parey.”
Etu BJP laga legislator para Europe ke hosa kotha tu nubujikina etu mamla aro jhamila ke taikhan laga haath te luwa laga laga bodli shanti aro halat normal te ahibole nimitey prathana kuribole koisey.
Imo Singh laga official statement te enaka koisey, “Etu tu eman monduk laga kotha asey ki etu meeting te larayi jhagra laga dhormic nature laga discuss kurisey kuntu tu taikhan laga taraf para pura puri galat asey aro swikar kuribole napara laga asey. Etu tu bisi bhak jati laga larayi asey kilemaney etu larayi te rajya laga duita jati laga group shamil asey. Hosa te etu larayi laga second phase tu Illegal hathyar bukhikina thaka Group aro Foreign Militia laga bich te asey kun khan tu rajya aro Central Security Forces laga khilaf te war kuri asey. Kun khan discuss kuri asey taikhan para etu janibo lagey ki rajya te dhorom laga khilaf te ja laga eku nai. India laga constitution te koikina thaka nisna sob manu logotey taikhan laga dhorom tu ke manibole pura azadi asey.”
Manipur laga larayi jhagra te dhorom laga eku angle nai koikina Singh para koisey ki Meitei jati laga Christian aro Muslim manu khan bi May 3, 2023 te suru huwa larayi jhagra laga dukh tu jhelisey aro duita jati laga bi bisi dhormic jaga khan tu etu jhamila te barbad hoisey.
Add Comment