Mizoram laga BJP media convener Johny Lalthanpuia para koisey ki Lalrinliana Sailo ke BJP party te Thursday (October 12) te shamil kuribole asey.
Tai para koisey ki Sailo tu November 7 te hobole thaka election te BJP laga ticket para election laribole asey. Hoilebi etu party laga high command tu etya tak bi kuntu jaga para election laribole asey etu final kuribole baki asey.
Assembly official khan para koisey ki Sailo para Wednesday din te tailaga assembly speaker position para resign kuridibo. Aro etu para taikey ahibole thaka election te BJP ticket para contest kuribole modod kuribo.
Mizoram te assembly election nuhuwa agey te MLA laga post para resign kora tu tai 8th legislator hobo.
Sailo para 2018 laga assembly election te MNF laga ticket te Chalfilh seat jitisey.
Sailo ke MNF party para ticket nidiya tu tai para MNF-NDA laga gatbandhan te khusi napa laga kotha kora nimitey asey.
Poila te, Mizoram Congress MLA KT Rokhaw, poila lagan eta Dr K. Beichhua aro Zoram People’s Movement (ZPM) laga modod para chola 5ta independent MLA para taikhan laga resignation submit kuridisey.
MLA KT Rokhaw para ZPM para resign kurikina MNF join kurisey. Aro etu election te tai Palak jaga para MNF party laga ticket te election laribole asey. Beichhua, kun ke MNF para etu saal laga January moina te party para olaidisey tai tu BJP laga ticket te tailaga ghor thaka jaga, Siaha para election laribole asey.
5jun independent MLA- Aizawl West-III constituency laga V L Zaithanzama, Aizawl North-II laga Vanlalthlana, Aizawl South II laga Lalchhuanthanga, Aizawl South-I laga Lalsawivunga aro Aizawl North-I laga Vanlalhlana para Tuesday (October 10) te resign kuridisey.
Taikhan tu asol te Zoram People’s Movement (ZPM) para thakisey hoilebi etu 5jun MLA para juwa bar laga assembly election te ‘independent’ hoikina election larisey kilemaney 2017 te form huwa ZPM tu utu homoitey Election Commission of India (ECI) logotey register hoikina thakanai.
Taikhan tu resign kuribole majbur hoijaisiley kilemaney ZPM laga ticket para election te bhak luwa para taikhan disqualify hoijabo parey.
ZPM lagan eta aro Chief Minister laga post laga candidate Lalduhoma ke resignation laga jarurat thakanai, kilemanet tai para 2021 te ZPM laga ticket para Serchhip seat te election larikina jitisey. ZPM party para Election Commission of India para 2019 te registration paisiley.
40-member thaka Mizoram assembly te election tu November 7 te hobole asey aro vote ginti kora tu December 3 te hobole asey.
Etu homoitey, MNF aro Congress aro Mizoram Kohhran Hruaitute Committee (MKHC) para vote ginti kora laga tarik December 3 (Sunday din) te rakha laga khilaf tea was uthaisey. Kilemaney Sunday din tu Christian community laga worship day asey.
MNF aro Congress para election commission ke vote ginti kora laga tarik bodli kuribole nimitey request kurikina already chitthi likhidisey.
MKHC laga ekjun leader para bi koisey ki taikhan para election commission ke vote ginti kora laga tarik bodli kuribole request kurikina ekta chitthi likhibo.
Add Comment