Regional

Assam ; Congress para Lok Sabha election nimitey 14 seat te contest kuribole asey

October 19, 2023
38 Views

New Delhi, October 19 : Assam Pradesh Congress Committee president Bhupen Borah para koisey ki congress party para ahibole thaka Lok Sabha election te sob 14 seat te election laribole asey.

Reporter khan ke kotha kora homoitey, Borah para koisey ki Congress para Lok Sabha election nimitey sob 14 seat para election te bhak lobole asey.

Etu Assam Pradesh Congress Committee (APCC) president laga bayan tu bisi jaruri asey kilemaney Congress tu Assam laga alag opposition party khan logotey alliance(gatbandhan) kurikina asey. Etya enaka sawal olai asey ki Congress para taikhna laga gatbandhan te thaka rajneetik party logotey seat share nukuribole faisla loisey naki. Congress para ahibole thaka Lok Sabha election te aro Assam te hobole thaka next assembly election te taikhan logotey alliance(gatbandhan) te thaka party khan logoteyeku seat sharing kuribo na nai etu bi kobo naprikina asey.

Moja laga kotha tu, Borah para etu mamla te kotha kora homoitey koisey ki tai para etu statement diya tu khali Assam laga Congress party chief hoikina hey nohoi hoilebi ekta opposition alliance(gatbandhan) laga ekta leader hoikina di asey.

Tai para enaka koisey, “ Ami para etu tu ekta Congress president hoikina nohoi hoilebi opposition party laga alliance laga ekta president hoikina di asey. Ami para hodai opposition alliance laga leader hoikina koisey ki amikhan para parliament laga election te contest kuribo. Ami tu 12 alag alag party laga alliance(gatbandan) laga president asey aro ami para poila para koikina ahi asey ki amikhan para pura 14 seat te contest kuribo.

Etu homoitey, Borah para media te enaka bayan diya ke react kurikina, Raijor Dal laga leader aro Sivasagar laga MLA Akhil Gogoi para Bhupen Borah ke tai para ki bayan disey etu aro bhal para samjhabole aro etu mamla te safi safi ahibole koisey.

Yaad rakhibole laga kotha tu etu asey ki Assam laga Congress tu alag khan logotey  CPI (M), CPI (ML) Liberation, Assam Jatiya Parishad, Raijor Dal, Jatiya Dal Asom, Rashtriya Janata Dal, Nationalist Congress Party aro Liberal Democratic Party logotey alliance(gatbandhan) te asey. Etu saal laga March moina fale, Congress para gatbandhan banabole laga kosis te etu party khan logotey meeting rakhisiley.

Interesting kotha tu etu asey ki , All India United Democratic Front (AIUDF), Trinamool Congress aro Aam Aadmi Party ke etu meeting karney invite koranai.

Etu homoitey, Borah para etu bi koisey ki ticket tu utu candidate khan ke dibole asey kun khan Congress party logotey lagatar loyal(imandar) hoikina thakisey. Tai para koisey ki election te contest kuribole mon thaka manu khan ke Lok Sabha election aro aha saal hobole thaka election nimitey bi ticket bhak nokora agey te taikhna laga imandari test kuribo..