New Delhi, October 27 : Prime Minister Narendra Modi para Friday din te pora likha, kheti bari aro health laga sector te application banabole nimitey 100 opor educational institution (jaiseki school, college) khan nimitey “5G Use Case Labs” launch kurisey.
Tai para koisey ki internet laga speed barija para zindigi kea san banaidibo aro pora likha, health care(gao laga ilaj aro dawai khan), kheti bari kora khan te modod dibo.
Tai para India Mobile Congress (IMC) te enaka koisey,“Internet high speed thaka aro available thaka duita bi jaruri asey.” Aro tatey tai para etu saal te Union finance minister Nirmala Sitharaman laga budget speech te announce kora lab khan bi launch kurisey.
Telecommunication department para etu lab khan banaisey. Aro etu lab khan nimitey sarkar para next 4 saal tak capital expenditure(etu lab ke cholabole khorcha huwa laga kimat) te 80% poisa modod kuribo aro 100% operational expenses bi dibo.
Aro capital expenditure te baki 20% tu Indian Institute of Technology, Indian Institutes of Information Technology, National Institutes of Technology aro alag engineering college khan para dibo.
Sob lab te komsikom 10ta faculty member aro 50 student thakibo. Sob lab te taikhan laga solution test kuribole nohoilebi banabole nimitey komsikom 5ta nutun suru huwa company nohoile Ekdam chutu, chutu aro Medium company khan shamil thakibo. Etu sob lab para saal te komsikom 10ta bustu ke banabole nohoilebi test kuribole lagibo.
India Mobile Congress (IMC) te speech diya homoitey, Modi para koisey ki India tu duniya laga top 3 start-up ecosystem aro second dangor mobile phone bana desh asey. Tai para koisey ki India laga electronic saman laga export(dusra desh te supply kora) tu etya Rs 2 lakh crore opor hoisey. Tai para tai Chief Minister hoikina thakiya homoitey India te telecommunication aro digital subidha te bodli ana laga kotha koisey.
Aditya Birla Group laga chairperson Kumar Mangalam Birla kun etu IMC laga inauguration ceremony te kotha kurisey tai para India laga digital public subidha laga tariff kurisey. Birla para enaka koisey, “ Duniya laga bisi desh khan para identity, payment aro data manage kora laga mamla te India laga digital public infrastructure ke cholabole tayar asey.”
Reliance Jio laga chairperson Akash Ambani aro Bharti Enterprise chairperson Sunil Bharti Mittal para bi IMC te kotha koisey.
Add Comment