India, 1 November : Star India all-rounder Hardik Pandya, kun ekta ankle jokhum hua para bhaal hui asey, tai toh team laga World Cup Netherlands laga khilaf November 12 dey nakhilia agey dey ahibo parey. Pandya toh tai laga left ankle jokhum kurishey tai nijor laga bowling dey fielding kuria homoi dey Bangladesh laga khilaf khel khilia homoi Pune dey October 19 dey. Tai New Zealand aro England laga khilaf khel toh miss kurishey aro Sri Lanka laga khilaf bhi fixtures miss kuriboley asey Thursday dey South Africa ke November 5 dey.
India laga final league match Netherlands laga khilaf asey Bengaluru dey November 12.
“Itu chutu jokhum hi asey. Tai bhaal para recover hui asey aro last league khel karney wapis ahiwoley parey. Possibility bhi asey ki tai seetha semifinal bhi khiliwo parey,” kuishey ekta BCCI source.
Six jeet logot bishi khel khan dey, India toh semifinals karney qualify huwoley asey.
Pandya laga all-round abilities karney compensate kuriboley, team toh upai nathakina playing eleven dey tuita podli kuribo lagi jaishey. Tai laga absence dey, management toh five bowlers logot khili asey kutey Suryakumar Yadav tai laga jagah dey six dey bat kuri asey.
Mohammad Shami ekta sizzling form dey thakina, management para bowler Pandya ke miss kurianai huilewi tai toh team laga balance karney critical asey.
England khikaf jitia piche deg, bowling coach Paras Mhambrey para Pandya julti wapis ahiwoley dey confidence dikhaishey. Pandya toh National Cricket Academy (NCA) Bengaluru dey recover hui asey.
“Medical team para itu dey sai asey aro Hardik aro NCA (National Cricket Academy) logot bhi touch dey asey. Olob din piche dey muikhan update ekta pawoley bisas rakhi asey,” Mhambrey kuishey Sunday dey.
Ekta BCCI media release hisab dey, Pandya toh team ke Lucknow dey join kuriboley thakishey England khel nahua agey dey huilewi tai squad logot thakianai.
