Manipur: Churachandpur-Bishnupur border te guli mara mari, 4jun murisey

Imphal, January 11 : Gondol huwa rajya Manipur te larayi jhagra huwa laga aro ekta ghotna te, Churachandpur district laga Haotak Phailen busti duita group majotey jordar guli mara mari hoisey. Aro etu guli mara mari te 4jun manu murisey. Etu ghotna tu January 10 laga 3 pm fale hoisey.

Haotak Phailen busti tu Bishnupur aro Churachandpur district laga border te asey. Bishnupur tu Meitei khan thaka busti asey aro Churachandpur tu Kuki khan thaka jaga asey. 

Haotak Phailen busti laga local manu khan para dawa kurisey ki etu duita group majotey guli mara mari huwa tu Haotak Phailen busti laga jungle te hoisey, kuntu tu Churachandpur bhitor te asey aro district headquarter para 38 km du rte asey. 

Taikhan para koisey ki Haotak Phailen busti laga northeast fale thaka busti, Tampha Khunou para ekta group manu ahikina osor huwa laga faida uthaikina etu busti laga jungle te gairkanooni tarika para jui jola khuri kati thakisey.

Haotak Phailen busti laga volunteer khan para jungle te huwa gairkanooni kaam laga report pa picheyte taikhan ke joldi kheda suru hoisey. Etu illegal kaam ke rokhabole laga kosis te, jordar guli mara mari suru hoisey, kuntu toh 1 ghonta para opor chulisey. Etu hats ate khuri katta te shamil thaka 4jun manu murisey, hoilebi Haotak Phailen busti volunteer khan laga side para kun bi moranai.

Kuki busti laga volunteer khan para etu gairkanooni para gusa manu khan tu hathyar bukhikina thaka badmash thakisey koikina koisey, hoilebi Tampha Khunou laga local manu khan para dawa kurisey ki etu 4jun mora manu tu sidha sadha manu khan thakisey kun khan guli mara mari huwa jaga osor te adwa shingibole jaisiley.  Taikhan para etu bi koisey ki etu 4jun ke Kuki atangwadi group para moraidisey, aro etu iljam ke Meitei khan para misa asey koikina inkar kurisey.

Etu ghotna te murija manu laga naam Oinam Romen Meitei(45 years ), Ahanthem Dara Meitei (56 years), Thoudam Ibomcha Meitei (53 years) aro Thoudam Anand Meitei (27 years) thakisey. Etu charjun majotey Ahnathem aro tailaga chokra Anand tu ekta ekey parivar para asey.