Guwahati, February 4 : Assam police para central Assam laga Sonitpur district te Christianity laga prachar kora laga iljam te duijun US manu ke arrest kurisey.
Reports hisap te, etu duijun US manu laga naam tu John Matthew Bone aro Michael James Flinchum asey. Taikhan duijun ke Sonitpur police para Saturday din te Tezpur area fale boha local manu khan para complaint kora hisap te arrest kora laga asey.
Sonitpur laga SP Susanta Biswa Sarma para koisey ki etu duijun ke bhal para permission noloikina Christianity feilabole nohoilebi prachar kuribole kosis kora nimitey $500 fine loisey.
Superintendent of Police(SP) Sarma para koisey, “ Taikhan tu tourist visa te thakisey aro nyom laga hisap te, taikhan tu dhormic kaam nohoilebi dhormic message khan prachar kuribole allowed nai. Etu nimitey, amikhan para taikhan ke police station te matikina $500 fine loisey.”
Hoilebi, Police para taikhan laga khilaf te case register koranai.
October 2022 te, Germany laga 7jun manu aro Sweden laga 3jun manu ke upper Assam laga Golaghat district aro Dibrugarh district para dhurisey . Taikhan ke missionary kaam kurikina visa laga nyom ke bhanga laga iljam te arrest kurisiley.
Add Comment