Singer-television show host Aditya Narayan para Chhattisgarh te tailaga show chuli thaka homoitey ekjun manu laga phone felaidiya nimitey tailaga fan khan tu gusa uthijaisey. Aditya Narayan laga Bhilai concert laga bisi video social media te olai asey.
Social media te ola video clip te, Aditya tu 2006 laga film Don laga Aaj Ki Raat gana kurithakisey. Tai stage te beraithaka homoitey, achanak para rukhikina audience te thaka ekjun fan ke saisey. Etu picheyte tai para ekjun manu laga haath para phone tanisey aro jitya tai para phone tanikina lobole paranai tai utu manu ke marisey. Etu picheyte, Aditya para etu manu laga phone tailaga haath te loikina felaidisey.
Etu picheyte, T-shirt, denim jacket aro pants lagaikina thaka Aditya tu gana kuribole continue kurisey. Etu video clip tu ekjun Instagram user DforDrug para share kurisiley. Etu Instagram User para caption te enaka disey, “Singer @adityanarayanofficial para Bhilai laga Rungta College te tailaga concert chuli thaka homoitey bhir laga majot para ekjun manu laga phone loikina hawa te felaidisey. Tai para enaka kiley kurisey etu tu najaney.”
Etu video te react kurikina ekjun manu para enaka comment kurisey, “ Fans nathakisey koiley artist bi nathakibo. Tai tu tailaga downfall mark kuri asey.” Aro ekta comment te enaka koisey, “ Toh, ki hoisey koiley, etu fan tu Aditya Narayan ke matibole mon thakisey. Hoilebi, tai golti para tailaga phone logotey Aditya laga theng te lagaidisey. Etu nimitey, Aditya tu biya paisey aro etu manu laga haath te marisey aro tailaga phone ke astey para felai disey. Matlab, hosabi, Aditya tu tailaga baba laga bina kotey fale bi nuhuwa laga hobole asey Tai ki nimitey eman dangor aro shakishali dikhai asey?”
Add Comment