Mumbai, February 15 : Aamir Khan para olop din ageyte IIM Bengaluru te te tai laga film ‘Laapataa Ladies’ laga screening kuribole nimitey ekta special appearance kurisey. Tai logotey etu film laga director Kiran Rao bi thakisey. Sawal aro Jawab kora laga session te fans logotey kotha kora homoitey, Aamir khan para tailaga ahibole thaka film laga sawal kora te jawab disey, khas kurikina 2022 te tailaga akhri film ‘Laal Singh Chaddha’ bhal response napa picheyte. Aamir Khan para koisey ki tailaga next film laga naam tu ‘Sitaare Zameen Par’ hobole asey. Aro koisey ki etu film laga shooting tu juwa hapta para suru hoijaisey. Tai para etu film tu Christmas laga homoitey release hobole akha kuri asey aro etu film tu ‘Taare Zameen Par’ film laga next level hobole asey, part 2 nisna. Aamir para koisey ki etu duita film laga theme tu ekey nisna thakibole asey, hoilebi etu film laga character aro kahani tu alag asey. Tai para koisey ki etu duita film majotey ki alag asey koiley ‘Taare Zameen Par’ film para manu khan laga mon chuidikina kandaidisey hoilebi ‘Sitaare Zameen Par’ para manu khan ke hasaidibo.Etu film ke Prasanna para direct kuri asey aro etu tu manu khan ke entertain kora laga film hobole asey Aro koisey ki taikhan tu etu ekey topic te sai asey hoilebi dusra perspective para.
Aamir Khan tu tailaga film ‘Laal Singh Chaddha’ picheyte ek saal nimitey acting para break loisiley. Tailaga akhri blockbuster film tu 2017 te release huwa ‘Secret Superstar’ film thakisey.
Add Comment