Dangal Actress Suhani Bhatnagar 19 years laga umar te murisey

Mumbai, February 18 : Suhani Bhatnagar, kun Amir Khan laga Dangal movie te jawan Babita Phogat laga role nimitey janai jai, tai tu Friday din te  19 years laga umar te murijaisey. Tai murija laga khobor tu sob manu nimitey ekta dangor shock nisna ahisey. Saturday din te, Suhani murija laga news online te aha picheyte, tailaga baba para media ke tailaga chukri(Suhani) laga kotha kurisey. News agency PTI para information diya hisap te, Suhani laga baba para koisey ki tailaga 19 years chukri tu dermatomyositis problem para dukh paikina asey kuntu tu ekta rare inflammatory bimari asey kuntu para skin te rash aro muscle ke kamjor banaidiye.

Suhani Bhatnagar tu February 7 te, All India Institute of Medical Sciences (AIIMS) te admit hoikina thakisey. Aro tailaga halat biya huwa nimitey February 16 te murijaisey. Tailaga baba Sumit Bhatnagar para reporter khan ke enaka koisey, “Suhani laga haath te dui moina ageyte ekta laal spot olaisiley. Amikhan para etu tu ekta allergy asey koikina bhabna kurisey aro Faridabad laga alag alag hospital laga doctor logotey jaisey, hoilebi tailaga bimar tu dhuribole paranai. Jitya tailaga halat biya hobole suru hoisey, amikhan para taikey AIIMS te admit kuridisey. Hoilebi tatey eku improvement thakanai aro tailaga lungs  tu bisi pani jama hoija nimitey barbad hoijaisey.”

Suhani tu Dangal picheyte acting para break loisiley. Tai tu tailag aparivar logotey Faridabad te buhi thakisey. Media reports hisap te, Suhani laga antim sanskar tu Saturday din te Delhi laga Ajronda cremation ground te kurisey. Suhani mora laga news online te aha picheyte, Amir Khan para sobsey first react kurisey. Aamir Khan laga production house ‘Aamir Khan Production’ para X te enaka post kurisey, “Amikhan tu Suhani murija laga khobor hunikina bisi dukh asey. Tailaga ama Poojaji aro pura parivar ke dukh jatai asey. Enaka talented jawan chukri, aro enaka team player thakisey tai tu. Dangak tu Suhani nathakile incomplete hobole thakisey. Suhani, apni tu amikhan laga mon te hodai ekta star hoikina thakibole asey. Apni laga atma ke shanti pabi.”