Rajinikanth para ‘Tirangaa’ film te Raaj Kumar logotey kaam kuribole mana kuridisiley

New Delhi, July 11 : Director Mehul Kumar para yaad kurikina koisey ki 1993 te release huwa deshbhakti laga action film ‘Tirangaa’ banaithaka homoitey Raaj Kumar aro Nana Patekar tu ekjun ekjun logotey kaam kuribole laga bari tee man savdhan hoikina thakisey. Etu duijun actor bi mood biya hoithaka nimitey jana jai. Aro taikhan duijun para bi advance te koidisey ki taikhan tu ek-dusra laga nakhra(nohoilebi gusa) bardash nukuribo. Ekta interview te, Mehul Kumar para koisey ki Raaj Kumar aro utu homoitey film te nutun thaka actor Nana Patekar para taikhan laga expectation tu suru para hey safa safi koidisey. Mehul Kumar para koisey ki Raaj Kumar tu etu film te main role nimitey confirm hoijaisiley. Hoilebi tai second lead nimitey actor pabole dukh paisey. Tai, Rajinikanth logotey jaisiley. Rajinikanth ke etu film laga kahani bhal lagisiley. Hoilebi Raaj Kumar laga mood biya hoithaka laga beybohar laga bari te bhabikina tai para etu film ke mana kuridisey. Etu picheyte, Methul para Naseeruddin Shah ke approach kurisiley aro tai para bi etu offer ke mana kuridisey. Aro last te tai Nana Patekar logotey jaisey. Kun utu homoitey mashoor film ‘Parinda’ te tailaga role nimitey mashoor thakisey. Hoilebi tai nijor ke ekta arthouse(high quality movie hoilebi eman mashoor nohoilebi successful nathaka) actor mani thakisey. Nana Patekar para Mehul ke tai commercial(profit kama) laga film nokorey koisiley. Mehul para taikey koisey ki tai commercial film nokora tak tai kun asey kun para bi najanibo. Utu homoitey arthouse movie khan tu Mumbai laga bahar te release bi hoi thakanai. Nana Patekar para film laga kahani huna picheyte khusi paisey. Hoilebi tailogotey ekta shart thakisey. Tai para koisey ki judi Raaj para eku bi kurisey koiley tai set charikina jaijabo aro wapas nahibo. Aro jitya Raaj ke koisey ki second lead nimitey Nana Patekar ke chunisey Raaj para koisey ki nana tu ekta rowdy asey, tai set te hala korey aro chilai. Tai haath bi cholai. Hoilebi Mehul para koisey ki etu shoot tu eku problem nohoikina agey barisey. Hoilebi tai para acknowledge kurisey ki etu duijun actor laga ek-dusra logotey rishta bhal thakanai.